කෘත්‍රිම බුද්ධි තාක්ෂණය සඳහා භාවිත කරන විශාල දත්ත මධ්‍යස්ථාන සම්බන්ධයෙන් ජාතික ප්‍රමිතීන් හඳුන්වා දීමට ඔස්ට්‍රේලියානු රජය සූදානම් වනවා.

AI පරිගණක සහ සර්වර් දහස් ගණනක් පැය 24 පුරා ක්‍රියාත්මක කිරීම සඳහා විශාල විදුලි බලයක් අවශ්‍ය වන අතර, එමගින් විදුලිබල ජාලයට අමතර පීඩනයක් ඇතිවිය හැකියි.

මෙම සර්වර් ඉතා උණුසුම් වන නිසා ඒවා සිසිල් කිරීමට විශාල ජල ප්‍රමාණයක්ද භාවිත කිරීමට සිදුවනවා.

විශේෂයෙන් නියඟ කාලවලදී දත්ත මධ්‍යස්ථානවල ජල අවශ්‍යතාව ඉහළ ගියහොත්, නිවාස, ගොවිපළ සහ අනෙකුත් ව්‍යාපාර සඳහා ඇති ජල සැපයුමට බලපෑම් එල්ල විය හැකියි.

විදුලිය ගල්අඟුරු හෝ ගෑස් මගින් නිපදවන්නේ නම්, AI දත්ත මධ්‍යස්ථාන ව්‍යාප්ත වීමත් සමඟ කාබන් විමෝචනයද ඉහළ යා හැකි බවට අවධානය යොමු වී තිබෙනවා.

ඒ අනුව දත්ත මධ්‍යස්ථාන භාවිත කරන විදුලිය, ජලය සහ ඉඩම් ප්‍රමාණය මෙන්ම ඒවායේ පාරිසරික බලපෑම් පිළිබඳ අනිවාර්ය වාර්තාකරණ ක්‍රම හඳුන්වා දීමට රජය සැලසුම් කර තිබෙනවා.

ඔස්ට්‍රේලියාව තුළ වැඩි වශයෙන් AI පුහුණු කිරීම මගින් ඉහළ නිපුණතා සහිත රැකියා, පර්යේෂණ සහ නවෝත්පාදන අවස්ථා වැඩි කළ හැකි බවයි රජය පවසන්නේ.

කෙසේවෙතත්, AI ආරක්ෂාව, ජාතික ආරක්ෂාව සහ ආයෝජනවලට ඇති බාධක සම්බන්ධයෙන්ද මෙම අදහස් විමසීමේදී විශේෂ අවධානයක් යොමු කර තිබෙනවා.

මහජනතාව, ව්‍යාපාර, තාක්ෂණ සමාගම්, පර්යේෂකයන් සහ සේවක සංවිධානවලට 2026 ඔක්තෝබර් 9 වැනිදා පස්වරු 5 දක්වා සිය අදහස් ඉදිරිපත් කළ හැකියි.