වීසා කාලය අවසන්ව තිබියදීත් ඔස්ට්‍රේලියාවේ රැඳී සිටින පුද්ගලයන් සොයා නීතිය ක්‍රියාත්මක කිරීම දැඩි කිරීමට ලේබර් රජය සූදානම් වනවා.

නව සංක්‍රමණ සැලැස්ම යටතේ වීසා නීති පිළිපැදීම පරීක්ෂා කරන අතිරේක නිලධාරීන් 100 දෙනෙකු බඳවා ගැනීමට නියමිතයි.

වීසා කාලය ඉක්මවා රැඳී සිටින පුද්ගලයන් අත්අඩංගුවට ගතහොත් රඳවා තැබීම සඳහා අතිරේක ඇඳන් 250ක්ද සූදානම් කිරීමට රජය සැලසුම් කර තිබෙනවා.

ඒ සඳහා මෙල්බන්හි Mickleham ප්‍රදේශයේ පිහිටි, කොවිඩ් සමයේ නිරෝධායන කටයුතු සඳහා ඉදිකළ මධ්‍යස්ථානයක් භාවිත කිරීම පිළිබඳවද අවධානය යොමු කර තිබෙනවා.

කෙසේවෙතත්, අමෙරිකාවේ ICE නිලධාරීන් සිදුකරන ආකාරයේ නිවාස සහ සේවා ස්ථාන වටලා මහා පරිමාණයෙන් පුද්ගලයන් අත්අඩංගුවට ගැනීමේ මෙහෙයුම් ඔස්ට්‍රේලියාවේ ක්‍රියාත්මක නොකරන බව ස්වදේශ කටයුතු අමාත්‍ය ටෝනි බර්ක් අවධාරණය කළා.

මෙය මැනවින් සැලසුම් කළ, සාධාරණ සහ නීත්‍යනුකූල ක්‍රියාමාර්ගයක් වනු ඇති බවද අමාත්‍යවරයා පවසනවා.

මෙවැනි වීසා නීති පරීක්ෂා කිරීම ඔස්ට්‍රේලියාවේ 2015 වසර දක්වා සාමාන්‍යයෙන් සිදුකළ ක්‍රියාවලියක් බව සංක්‍රමණ විශේෂඥයන් පෙන්වා දී තිබෙනවා.

ටෝනි බර්ක් පවසන්නේ මීට පෙර එක් පුද්ගලයෙකු බලධාරීන් විසින් රඳවාගන්නා සෑම අවස්ථාවකදීම තවත් පුද්ගලයන් හයත් හතත් අතර සංඛ්‍යාවක් ස්වේච්ඡාවෙන් රටින් පිටවී ගිය බවයි.

නව ක්‍රියාමාර්ග මගින්ද වීසා කාලය අවසන් වූ පුද්ගලයන් තමන් විසින්ම රටින් පිටවීමට පෙළඹවීම රජයේ ප්‍රධාන අරමුණ වී තිබෙනවා.

වීසා බලපත්‍රයක් නොමැතිව තවදුරටත් ඔස්ට්‍රේලියාවේ රැඳී සිටිය නොහැකි බවට පැහැදිලි පණිවිඩයක් ලබාදීමෙන් පුද්ගල හැසිරීම් වෙනස් කිරීමට හැකිවනු ඇතැයි අමාත්‍යවරයා විශ්වාසය පළ කරනවා.

එහෙත් රැඳවුම් පහසුකම් පුළුල් කිරීම මගින් සංක්‍රමණිකයන් ඉලක්ක කර දැඩි ප්‍රතිපත්තියක් අනුගමනය කරන බව පවසමින් ග්‍රීන්ස් පක්ෂය සහ සරණාගත අයිතිවාසිකම් සංවිධාන මෙම සැලැස්ම විවේචනය කර තිබෙනවා.

රජය පවසන්නේ මෙම පියවර මහා පරිමාණ වැටලීම් සඳහා නොව, ඔස්ට්‍රේලියානු වීසා පද්ධතිය කෙරෙහි ජනතා විශ්වාසය තහවුරු කිරීම සහ වීසා නීති නිසි ලෙස ක්‍රියාත්මක කිරීම සඳහා බවයි.