ඔස්ට්‍රේලියාවේ වාර්ෂික ශුද්ධ විදේශ සංක්‍රමණය 225,000 දක්වා අඩු කිරීම අනිවාර්යයෙන්ම සිදුකරන බව ස්වදේශ කටයුතු අමාත්‍ය ටෝනි බර්ක් ප්‍රකාශ කර තිබෙනවා.

මෙම 225,000 සංඛ්‍යාව මුලින් භාණ්ඩාගාරය විසින් ඉදිරිපත් කළ පුරෝකථනයක් පමණක් වූ නමුත්, රජය දැන් එය නිල ඉලක්කයක් ලෙස පිළිගෙන තිබෙනවා.

ජාතික මාධ්‍ය සමාජයේ පැවති දේශනයකදී මෙම ඉලක්කය අසාර්ථක විය හැකිදැයි විමසූ අවස්ථාවේ, එවැනි තත්ත්වයක් ඇති නොවන බව ටෝනි බර්ක් අවධාරණය කළා.

මීට වසරකට පමණ පෙර ඔහු පවසා තිබුණේ සංක්‍රමණය සඳහා නිශ්චිත “මැජික් අංකයක්” නොමැති බවත්, ඔස්ට්‍රේලියානු පුරවැසියන් රටට පැමිණීම සහ පිටවීම වැනි කරුණු නිසා ශුද්ධ සංක්‍රමණය නිවැරදිව පුරෝකථනය කිරීම අපහසු බවයි.

එහෙත් විපක්ෂයෙන් සහ මහජනතාවගෙන් එල්ල වන පීඩනය හමුවේ රජය දැන් 225,000 ඉලක්කයට නිල වශයෙන් කැපවී සිටිනවා.

ශුද්ධ විදේශ සංක්‍රමණය යනු රටට පැමිණෙන පුද්ගලයන්ගේ සංඛ්‍යාවෙන් රට හැර යන පුද්ගලයන්ගේ සංඛ්‍යාව අඩු කිරීමෙන් ලැබෙන අගයයි.

මෙම අගය තීරණය කිරීමේදී වීසා දත්ත, පුද්ගලයන් රටට පැමිණෙන සහ පිටව යන ආකාරය මෙන්ම රජයේ සංක්‍රමණ ප්‍රතිපත්තිද භාණ්ඩාගාරය විසින් සලකා බලනවා.

කෙසේවෙතත්, ඔස්ට්‍රේලියාවේ සිටින තාවකාලික වීසා හිමියන් රටින් පිටවන්නේ කවදාදැයි නිවැරදිව හඳුනාගැනීම අපහසු වීම නිසා පසුගිය කාලයේ සංක්‍රමණ පුරෝකථන කිහිපයක්ම වැරදී තිබුණා.

රජයේ නව සැලැස්ම යටතේ ශිෂ්‍ය වීසා හිමියන්ගේ පවුලේ සාමාජිකයන් රැගෙන ඒම, වැඩ කරන නිවාඩු වීසා දීර්ඝ කිරීම, එක වීසාවකින් තවත් වීසාවකට මාරුවෙමින් රට තුළ රැඳී සිටීම සහ වීසා කාලය ඉක්මවා රැඳී සිටීම පාලනය කිරීමට නියමිතයි.

පශ්චාත් කොවිඩ් සමයේ සංක්‍රමණය අධික ලෙස ඉහළ ගොස් ඇති බව පිළිගන්නා ටෝනි බර්ක්, නිවාස සැපයුමට එම වර්ධනයට ගැළපීමට කාලය අවශ්‍ය බවද පවසනවා.

නමුත් සංක්‍රමණය 225,000 දක්වා අඩු කළත්, එයින් ලේබර් රජයට විශාල දේශපාලන වාසියක් ලැබෙනු ඇති බවට සහතිකයක් නොමැති බවයි ABC විශ්ලේෂණය පෙන්වා දෙන්නේ.

රෙඩ්බ්‍රිජ් ආයතනයේ සමීක්ෂණ අනුව සංක්‍රමණය ප්‍රධාන ඡන්ද තීරණාත්මක කරුණක් ලෙස සලකන්නේ ඡන්දදායකයන්ගෙන් සියයට 10ක් පමණක් වන අතර, ඔවුන්ගෙන් බොහෝ දෙනෙකු දැනටමත් One Nation පක්ෂයට සහාය දක්වන බව සඳහන්.

ඡන්දදායකයන්ට වඩාත් වැදගත් ප්‍රශ්න ලෙස තවමත් ආර්ථිකය සහ සෞඛ්‍ය ක්ෂේත්‍රය ඉදිරියෙන් සිටින බවද එම සමීක්ෂණයෙන් පෙන්වා දී තිබෙනවා.

මේ අතර One Nation පක්ෂය මුලින් ශුද්ධ සංක්‍රමණය ඍණ අගයකට ගෙන ගොස්, වසර තුනකට පසුව එය 130,000ක මට්ටමකට තැබීමට යෝජනා කරනවා.

සන්ධානය සංක්‍රමණ ඉලක්කය රටේ ඉදිකරන නව නිවාස සංඛ්‍යාවට සම්බන්ධ කර, එය 150,000ත් 170,000ත් අතර මට්ටමකට ගෙන ඒමට ඉඩ ඇති බව වාර්තාවේ සඳහන්.

ඊට ප්‍රතිචාර දක්වන ටෝනි බර්ක් පවසන්නේ සංක්‍රමණය ඊටත් වඩා විශාල ලෙස කපා හැරීමෙන් ආර්ථිකයට සහ අත්‍යවශ්‍ය සේවාවලට බරපතළ හානියක් සිදුවිය හැකි බවයි.

නිවාස හිඟය, රැකියා විරහිතභාවය සහ යටිතල පහසුකම් මත පීඩනය වැඩිවන සෑම අවස්ථාවකදීම 225,000 ඉලක්කය තවදුරටත් අඩු කරන ලෙස රජයට දේශපාලන පීඩනයක් එල්ල විය හැකියි.

ඒ අනුව සංක්‍රමණ පද්ධතියේ ඇතැම් කොටස් දැඩිව පාලනය කළ හැකි වුවත්, ශුද්ධ සංක්‍රමණ සංඛ්‍යාව සම්පූර්ණයෙන්ම නිශ්චිත අගයක තබා ගැනීමට රජයට නොහැකි වීම මෙහි ඇති විශාලතම අභියෝගය බවයි ABC News විශ්ලේෂණය පෙන්වා දෙන්නේ.