ශීත සමය අවසන් වී වසන්ත කාලය ආරම්භ වී තිබුණත්, Victoria ප්‍රාන්තයේ influenza රෝගීන් සංඛ්‍යාව මේ වනවිට වේගයෙන් ඉහළ යමින් පවතින අතර, පසුගිය සති 7 තුළ රෝගීන්ගේ වාර්තාගතවීම් 400%කින් පමණ වැඩි වී ඇති බව නව දත්තවලින් හෙළි වී තිබෙනවා.

විශේෂයෙන්ම influenza A වෛරසය නිසා ඇතිවන රෝගී තත්ත්වයන් වැඩි වී ඇති අතර, මේ වසරේ Victoria හි උණ සමය සාමාන්‍යයෙන් දක්නට ලැබෙන කාලයට වඩා පසුව ඉහළ යාම සෞඛ්‍ය බලධාරීන්ගේ අවධානයට ලක්වී තිබෙනවා.

පසුගිය සති කිහිපය තුළ උණ සහ වෙනත් ශ්වසන රෝග නිසා රෝහල් වෙත පැමිණෙන පිරිසද වැඩි වී ඇති අතර, එම වැඩිවීම අතරින් විශාල කොටසක් ළමුන් අතරින් වාර්තා වන බව Victoria සෞඛ්‍ය අංශ පෙන්වා දෙනවා.

විශේෂඥයන් පවසන්නේ ශීත කාලය අවසන් වීමත් සමඟ උණ රෝගය අඩු වේ යැයි බලාපොරොත්තු වුණත්, මේ වසරේ එහි ඉහළම අවස්ථාව තවමත් පැමිණ නොතිබිය හැකි බවයි.

Australia පුරාත් influenza රෝගීන් සංඛ්‍යාව ඉහළ යමින් පවතින අතර, සැප්තැම්බර් 6න් අවසන් වූ සති දෙක තුළ රෝගීන් 31,650කට වැඩි පිරිසක් වාර්තා වී ඇති අතර, එය ඊට පෙර සති දෙක සමඟ සසඳන විට 27.2%ක වැඩිවීමක්.

සෞඛ්‍ය විශේෂඥයන් පෙන්වා දෙන්නේ උණ එන්නත ලබා නොගත් පුද්ගලයන්ට තවමත් එය ලබාගැනීමට ප්‍රමාද වී නොමැති බවත්, උණ රෝග ලක්ෂණ පවතින විට නිවසේ රැඳී සිටීමෙන් රෝගය තවත් අය අතර පැතිරීම අඩු කළ හැකි බවත්ය.

මේ අතර Victoria හි පාසල් නිවාඩු කාලයත් සමඟ ඉදිරි සති කිහිපයේදී influenza රෝගීන්ගේ වැඩිවීම තවදුරටත් පැවතිය හැකි බවට සෞඛ්‍ය බලධාරීන් අනතුරු අඟවා ඇති අතර, උණ රෝග ලක්ෂණ ඇති පුද්ගලයන් විශේෂයෙන්ම ළමුන් ගැන වැඩි අවධානයක් යොමු කරන ලෙස ඉල්ලා සිටිනවා.