ඔස්ට්‍රේලියාව සංක්‍රමණ සංඛ්‍යාව අඩු කිරීම සහ වීසා ක්‍රමයේ අයථා භාවිත වැළැක්වීම සඳහා නව ප්‍රතිසංස්කරණ මාලාවක් ප්‍රකාශයට පත් කර තිබෙනවා.

විදේශීය සිසුන් සමඟ ඔවුන්ගේ සැමියා, බිරිඳ හෝ දරුවන් රැගෙන ඒම සීමා කිරීමට රජය යෝජනා කර ඇති නමුත් මෙය තවම පාර්ලිමේන්තුවෙන් සම්මත වූ නීතියක් නොවන අතර, ක්‍රියාත්මක වන දිනය සහ විශේෂ නිදහස් කිරීම් මෙතෙක් අවසන් කර නැහැ.

අධ්‍යාපන වීසා දිගු කරගැනීම සඳහා පහළ හෝ සමාන මට්ටමේ පාඨමාලාවලට මාරුවීමද සීමා කිරීමට නියමිතයි.

උදාහරණයක් ලෙස උපාධියකින් පශ්චාත් උපාධියකට යාම පිළිගත හැකි වුවත්, වීසා කාලය දිගු කරගැනීම සඳහා නැවත පහළ මට්ටමේ පාඨමාලාවකට යාම දැඩි පරීක්ෂාවට ලක්විය හැකියි.

සංචාරක වීසා මත ඔස්ට්‍රේලියාවට පැමිණ පසුව ශිෂ්‍ය හෝ වෙනත් වීසාවකට මාරුවීමද “No Further Stay” කොන්දේසි නිසා බොහෝ දුරට අවහිර විය හැකි වනවා.

වීසා කාලය ඉක්මවා රැඳී සිටින පුද්ගලයන්, ව්‍යාජ ආරක්ෂණ ඉල්ලීම් සහ වංචනික සංක්‍රමණ නියෝජිතයන් සම්බන්ධයෙන්ද පරීක්ෂණ දැඩි කිරීමට නියමිත බවයි අමාත්‍ය ටෝනි බර්ක් අනතුරු ඇගවුයේ.

කෙසේ වෙතත් සෞඛ්‍ය, ඉදිකිරීම්, අධ්‍යාපන, පතල් හා ඛනිජ, කෘෂිකර්ම සහ ධීවර ක්ෂේත්‍රවල සැබෑ කුසලතා ඇති ශ්‍රී ලාංකිකයින්ට නව ප්‍රතිසංස්කරණය යටතේ අවස්ථාව උදාවනවා.

මෙම අංශවල පුහුණුව, පිළිගත් සුදුසුකම්, ඉංග්‍රීසි දැනුම සහ නීත්‍යානුකූල රැකියා අනුග්‍රාහකයෙකු තිබීම වඩාත් වැදගත් වනු ඇති.

ඒ හේතුවෙන් නීති ක්‍රියාත්මක වන දිනය, දැනට අයදුම් කළ අයට ඇති සංක්‍රාන්තික විධිවිධාන සහ පවුල් සීමා ගැන ඔස්ට්‍රේලියාවෙන් ලිඛිත පැහැදිලි කිරීමක් ලබාගැනීම ශ්‍රී ලංකා රජය විසින් ඉදිරියේදී සිදුකරනු ඇති.

එමෙන්ම ආචාර්ය උපාධි, පර්යේෂණ සහ අත්‍යවශ්‍ය කුසලතා සහිත සිසුන්ගේ පවුල් සඳහා සීමිත නිදහස් කිරීම් ඉල්ලා රාජ්‍ය තාන්ත්‍රික සාකච්ඡා පැවැත්වීම ඉදිරියේදී සිදුකිරීමට නියමිතයි.

ශ්‍රී ලාංකික වෘත්තීය සහ අධ්‍යාපන සුදුසුකම් ඔස්ට්‍රේලියාවේ පිළිගැනීම පහසු කිරීමට ආයතනික එකඟතා ඇති කිරීම රජයන් විසින් සිදුකළ යුතු බවයි විශේෂඥයින් පෙන්වාදෙන්නේ.

ශ්‍රී ලාංකිකයන්ට වීසා සහතික කළ නොහැකි නමුත්, පැහැදිලි තොරතුරු හා සාධාරණ සංක්‍රාන්තික කාලයක් ලබාගැනීමට රජයට මැදිහත් විය හැකි වනවා.

එමෙන්ම ශ්‍රී ලාංකික සිසුන් හා සංක්‍රමණිකයින් ප්‍රවෘත්ති ශීර්ෂයක් පමණක් දැක පාඨමාලාවක් අවලංගු කිරීම හෝ වීසා සැලසුම වෙනස් කිරීම නොකළ යුතු වන අතර තම වීසා කොන්දේසි, ImmiAccount පණිවිඩ සහ ඔස්ට්‍රේලියානු ස්වදේශ කටයුතු අමාත්‍යාංශයේ නිල නිවේදන පරීක්ෂා කළ යුතුයි.

සැමියා, බිරිඳ හෝ දරුවන් සමඟ යාමට බලාපොරොත්තු වන අය නීතිය අවසන් වනතුරු විශාල මුදල් ගෙවීමට පෙර ලිඛිත උපදෙස් ලබාගත යුතු වන අතර උපකාර අවශ්‍ය නම් ලියාපදිංචි ඔස්ට්‍රේලියානු සංක්‍රමණ නියෝජිතයෙකු හෝ නීතිඥයෙකු පමණක් භාවිත කිරීම වැදගත් වනවා.