ඔස්ට්‍රේලියාවේ ජනගහනය 2065–66 වනවිට මිලියන 39.3ක් පමණ දක්වා ඉහළ යනු ඇති බව නව Intergenerational Report පුරෝකථනයකින් හෙළි වී තිබෙනවා.

Treasury විසින් ඉදිරි වසර 40ක ඔස්ට්‍රේලියාවේ ජනගහනය, ආර්ථිකය සහ සමාජීය වෙනස්කම් පිළිබඳ සිදුකර ඇති මෙම පුරෝකථනයට අනුව, ඉදිරි දශක කිහිපය තුළ ජනගහන වර්ධන වේගය පසුගිය වසර 40ට සාපේක්ෂව අඩු වීමට නියමිතයි.

පසුගිය වසර 40 තුළ වාර්ෂික ජනගහන වර්ධනය සාමාන්‍යයෙන් 1.4%ක් පමණ වූ නමුත්, ඉදිරි වසර 40 තුළ එය සාමාන්‍යයෙන් 0.9%ක් පමණ වනු ඇතැයි පුරෝකථනය කර තිබෙනවා.

මෙයට ප්‍රධාන හේතුවක් ලෙස ඔස්ට්‍රේලියානු ජනතාව වැඩි කාලයක් ජීවත් වීමත් සමඟ දරු උපත් ප්‍රමාණය අඩුවීම හඳුනාගෙන ඇති අතර, ඒ හේතුවෙන් රටේ ජනගහනය වයස්ගත වීමේ ප්‍රවණතාව තවදුරටත් ඉහළ යනු ඇති බව සඳහන්.

එමෙන්ම 2066 වනවිට ඔස්ට්‍රේලියානු කාන්තාවන්ගේ උපතේදී අපේක්ෂිත ආයු කාලය අවුරුදු 89.5ක් දක්වාත්, පිරිමින්ගේ ආයු කාලය අවුරුදු 86.1ක් දක්වාත් ඉහළ යනු ඇතැයි පුරෝකථනය කර තිබෙනවා.

වයස්ගත ජනගහනය වැඩිවීමත් සමඟ සෞඛ්‍ය සේවා, රැකවරණ සේවා සහ විශ්‍රාම වැටුප් වැනි ක්ෂේත්‍ර සඳහා ඉදිරියේදී ඇතිවන අවශ්‍යතාද වෙනස් විය හැකි බව මෙම වාර්තාවේ පුරෝකථන මගින් පෙන්වා දෙනවා.

ඒ අනුව ඉදිරි දශක කිහිපය තුළ ඔස්ට්‍රේලියාව අදට වඩා වයස්ගත ජනගහනයක් සහ මන්දගාමී ජනගහන වර්ධනයක් සහිත රටක් බවට පත්වනු ඇති බව නව Intergenerational Report මගින් පෙන්වා දී තිබෙනවා.