නිව් සවුත් වේල්ස් ප්‍රාන්තයේදී එක්දිනක් තුළ පැය 10ක කාලයකදී ගෘහස්ථ හිංසන සිදුවීම් හේතුවෙන් කාන්තාවන් තිදෙනෙකු ඝාතනයට ලක්වීම සම්බන්ධයෙන් ප්‍රාන්ත අග්‍රාමාත්‍ය ක්‍රිස් මින්ස් දැඩි කම්පාව පළ කර තිබෙනවා.

අවුරුදු 23, 70 සහ 90 වයස්වල පසුවූ මෙම කාන්තාවන් තිදෙනා, පසුගිය සෙනසුරාදා දින Wagga Wagga, Bondi Beach සහ Mole River යන ප්‍රදේශවල සිදුවූ වෙනස් සිදුවීම් තුනකදී ජීවිතක්ෂයට පත්ව ඇති බවයි වාර්තා වන්නේ.

පළමු සිදුවීමෙන් 23 හැවිරිදි තරුණියක් පිහි ඇණුමකින් මියගොස් ඇති අතර, ඒ සම්බන්ධයෙන් 31 හැවිරිදි පුද්ගලයෙකු අත්අඩංගුවට ගෙන තිබෙනවා.

දෙවන සිදුවීම ලෙස බොන්ඩායි බීච්හි නිවසක් තුළදී 90 හැවිරිදි වියේ පසුවූ කාන්තාවක් පිහි ඇණුමකින් මියගොස් ඇති අතර, ඇයගේ මිනීමැරුම සම්බන්ධයෙන් ඇයගේ මුණුබුරා ලෙස සැක කෙරෙන 47 හැවිරිදි පුද්ගලයෙකු පොලිස් භාරයට ගැණුනා.

3 වන සිදුවීම ලෙස Mole River ප්‍රදේශයේදී 70 හැවිරිදි කාන්තාවක් ගින්නකට හසු වූ නිවසක් තුළ මියගොස් සිටියදී හමුවී ඇති අතර, ඊට සම්බන්ධ 37 හැවිරිදි සැකකරුවෙකු ද පොලිසිය විසින් අත්අඩංගුවට ගෙන තිබෙනවා.

මෙම කම්පන සහගත සහ බිහිසුණු අපරාධ හමුවේ පවුල් සංවිධාන දැඩි ශෝකයකට පත්ව සිටින බවයි අග්‍රාමාත්‍ය ක්‍රිස් මින්ස් සඳහන් කළේ.

මේ අතර මෙම මරණ සිදුවීම් ලෙස පමණක් නොසලකා කාන්තාවන්ට එරෙහි ගෘහස්ථ ප්‍රචණ්ඩත්වය පිළිබඳ දැඩි අවධානය යොමු කළ යුතු බව NSW විපක්ෂ නායක Kellie Sloane ද අවධාරණය කරනවා.