ඔස්ට්‍රේලියාවේ එකවර රැකියා දෙකක් හෝ ඊට වැඩි ප්‍රමාණයක් කරන සේවකයන්ගේ ප්‍රතිශතය 6.9%ක් දක්වා මෙතෙක් ඉතිහාසයේ වාර්තා වූ ඉහළම අගය කරා ළඟා වී ඇති බව නවතම දත්තවලින් හෙළි වී තිබෙනවා.

ඒ අනුව මේ වනවිට ඔස්ට්‍රේලියානුවන් මිලියන 1.49 කට අධික පිරිසක් රැකියා එකකට වඩා කරමින් සිටින බවයි වාර්තා වන්නේ.

1994 සිට 2019 දක්වා මෙම ප්‍රතිශතය 5%ත් 6%ත් අතර පැවති නමුත් දැන් එය වාර්තාගත මට්ටමකට පැමිණ තිබෙනවා.

මේ අතර වෘත්තීය ජීවිතයේ වසර 10කට වැඩි කාලයක් ගත කළ පුද්ගලයන් අතර දෙවැනි ආදායම් මාර්ගයක් සොයාගැනීම වේගයෙන් වැඩි වී ඇති අතර, ජීවන වියදම් ඉහළ යාම මීට හේතු විය හැකි බවයි විශ්ලේෂකයන් පෙන්වා දෙන්නේ.

රැකියා කිහිපයක් කරන පුද්ගලයෙකු සතියකට සාමාන්‍යයෙන් පැය 39.3ක් වැඩ කරන අතර, එක් රැකියාවක් පමණක් කරන පුද්ගලයෙකුගේ සාමාන්‍යය පැය 34.8ක් ලෙස සඳහන්.

මෙම වසරේ අප්‍රේල් සිට ජූනි දක්වා මාස තුනේදී පමණක් තවත් 64,900 දෙනෙකු රැකියා කිහිපයක් කරන කණ්ඩායමට එක්වී තිබෙනවා.

එමෙන්ම රැකියා කිහිපයක් කරන සියලු සේවකයන්ගෙන් 55%ක් කාන්තාවන් වන අතර, රැකියාවල නිරත ඔස්ට්‍රේලියානු කාන්තාවන්ගෙන් 7.7%ක් අවම වශයෙන් සේවා ස්ථාන දෙකක වැඩ කරන බව ද දත්ත පෙන්වා දෙනවා.