Melbourne බටහිර ප්‍රදේශයේ පුද්ගලයෙකුගේ ගෙල සිරකර පහරදීමේ චෝදනාවලට 21 හැවිරිදි ඉන්දීය ශිෂ්‍ය Sahil Sharma වරද පිළිගෙන තිබෙනවා.

සැප්තැම්බර් 5 වැනිදා බීමතින් සිටියදී ඇතිවූ ආරවුලක් අතරතුර ඔහු එක් අතකින් තත්පර හතරක් හෝ පහක් පමණ වින්දිතයාගේ ගෙල සිරකර ඇති බව Sunshine Magistrates’ Court අධිකරණයට දැනුම් දී තිබුණා.

ඔහු එල්ල කළ පහරකින් වින්දිතයා සිහිසුන් වූ බවද අධිකරණයේදී සඳහන් වී තිබෙනවා.

Sharmaගේ Student Visa බලපත්‍රය ඔක්තෝබර් මාසයේදී අවසන් වන අතර, නැවත ඉන්දියාවට යාම සඳහා ගුවන් ටිකට්පතක්ද වෙන්කර ඇති බව ඔහු වෙනුවෙන් අධිකරණයට දැනුම් දී තිබුණා.

Community Corrections Order එකක් වෙනුවට විශාල දඩයක් නියම කරන ලෙස ඔහු ඉල්ලා සිටියත් මහේස්ත්‍රාත්වරිය එම ඉල්ලීම පිළිගෙන නැහැ.

ගෙල සිර කිරීම තවත් තත්පර කිහිපයක් පැවතුණේ නම් වින්දිතයා මියයාමට පවා ඉඩ තිබූ බව පෙන්වාදුන් මහේස්ත්‍රාත්වරිය, සිරදඬුවමක් සලකා නොබැලීම සම්බන්ධයෙන් Sharma “වාසනාවන්ත” බවද ප්‍රකාශ කර තිබෙනවා.

Community Corrections Order එකක් සඳහා ඔහු ඇගයීමට ලක්කිරීමෙන් පසු අවසන් දඬුවම ඉදිරි දිනයකදී ප්‍රකාශයට පත්කිරීමට නියමිතයි.