සිඩ්නිහි Blue Mountains ප්‍රදේශයේදී, මවක් විසින් සිය දරුවන් තිදෙනාට සිදුකළ අමානුෂික පිහි ප්‍රහාරයකින් එක් දරුවෙකු මියගොස්, අනෙක් දරුවන් දෙදෙනා බරපතළ තුවාල ලබා රෝහල්ගත කර තිබෙනවා.

පසුගිය ඉරිදා Picnic එකක් යන බව දරුවන්ගේ පියාට පවසා මෙම කාන්තාව දරුවන් තිදෙනා මෝටර් රථයකින් Valley Heights ප්‍රදේශයේ වීදියක් වෙත රැගෙන ගොස් තිබෙනවා.

අවුරුදු 5, 3 සහ 1 යන වයස්වල පසුවූ මෙම දරුවන් මෝටර් රථයේ seatsවලට බැඳ ඇය මෙම පිහි ප්‍රහාරය එල්ල කර, පසුව ඇයට ද තුවාල සිදුකරගෙන ඇති බවයි වාර්තා වන්නේ.

මෙම ප්‍රහාරයෙන් පස් හැවිරිදි පිරිමි දරුවා එම ස්ථානේදීම ජීවිතක්ෂයට පත්ව ඇති අතර, තුවාල ලැබූ සෙසු දරුවන් දෙදෙනාගේ සහ මව හදිසි වෛද්‍ය ප්‍රතිකාරවලින් අනතුරුව කඩිනමින් රෝහල්ගත කෙරුණා.

සිද්ධිය සම්බන්ධයෙන් විමර්ශන සිදුකළ පොලිසිය, අදාළ මවට එරෙහිව ගෘහස්ථ ප්‍රචණ්ඩත්වය හා සම්බන්ධ මිනීමැරුම් චෝදනාවක් සහ මිනීමැරීමේ චේතනාවෙන් තුවාල සිදු කිරීම හෝ බරපතල ශාරීරික හානි සිදු කිරීමේ චෝදනා දෙකක් ගොනු කරනු ලැබුවා.

ඇය අද වීඩියෝ තාක්ෂණය ඔස්සේ Penrith ප්‍රාදේශීය අධිකරණයට ඉදිරිපත් කිරීමෙන් අනතුරුව, ලබන නොවැම්බර් 20 වැනි දින දක්වා රක්ෂිත බන්ධනාගාරගත කර තිබෙනවා.