බටහිර ඔස්ට්‍රේලියාවේ Bassendean ප්‍රදේශයේ 70 හැවිරිදි වියේ පසුවන විශ්‍රාමික කාන්තාවක් Saturday Lotto හි සමස්ත ඩොලර් මිලියන 6.4ක පළමු ත්‍යාගය දිනාගෙන තිබෙනවා.

රට පුරා වාර්තා වූ එකම Division One ජයග්‍රාහිකාව ඇය වන අතර, අංක නැවත නැවතත් පරීක්ෂා කළේ තම දෑස් රවටනවාදැයි සැක සිතුණු නිසා බව ඇය පවසා තිබෙනවා.

වසර ගණනාවක් Galleria Lottery Centre වෙතින් ලොතරැයි පත් මිලදී ගන්නා ඇය, සඳුදා උදෑසනම සිය සහෝදරිය සහ ලේලිය සමඟ Lotterywest කාර්යාලයට පැමිණ ත්‍යාගය ලබාගෙන තිබුණා.

දිගු කාලයක් කුලියට ජීවත්වූ නිවස මුලින්ම මිලදී ගැනීම ඇගේ සැලසුමයි.

අනතුරුව සිය සහෝදරියට සහ ලේලියට මෝටර් රථයක් බැගින් මිලදී දීමටද ඇය තීරණය කර තිබෙනවා.

දුෂ්කර කාලයකදී තමන්ට උපකාර කළ Vinnies පුණ්‍යායතනයට මුදල් පරිත්‍යාගයක් කිරීමටද ඇය සූදානම්.

සාමාන්‍යයෙන් Saturday Lotto පළමු ත්‍යාගය ජයග්‍රාහකයන් කිහිපදෙනෙකු අතර බෙදී යන බැවින්, එක් පුද්ගලයෙකු සම්පූර්ණ ඩොලර් මිලියන 6.4ම දිනාගැනීම ඉතා දුර්ලභ සිදුවීමක් බව Lotterywest පවසනවා.