ඔස්ට්‍රේලියාවේ දරුවන් දෙදෙනෙකු හෝ ඊට වැඩි සංඛ්‍යාවක් ඇති පවුලකට දරුවන් ඇති දැඩි කිරීම සඳහා වසරකට අවම වශයෙන් ඔස්ට්‍රේලියානු ඩොලර් 36,500ක් පමණ වැය වන බව නව පර්යේෂණයකින් හෙළි වී තිබෙනවා.

The Parenthood ආයතනය විසින් නිකුත් කළ දත්ත අනුව, පවුලක් පවත්වාගෙන යාමට වැයවන මුදල පසුගිය වසර 20 තුළ 134%කින් ඉහළ ගොස් ඇති අතර, එම කාලය තුළ පවුල් ආදායම ඉහළ ගොස් ඇත්තේ 102%කින් පමණයි.

දරුවන් ඇති දැඩි කිරීමේ වියදම් අතරින් childcare වියදමට මේ වනවිට 33%ක පමණ කොටසක් හිමිවන අතර, 2003 වසරේදී එය 27%ක් ලෙස වාර්තා වී තිබෙනවා.

ආහාර, ඇඳුම්, සෞඛ්‍ය, ප්‍රවාහන, අධ්‍යාපන, විනෝදාස්වාද සහ ගෘහස්ථ අවශ්‍යතා වැනි වියදම්ද දරුවන් ඇති දැඩි කිරීමේ සමස්ත වියදමට ඇතුළත් වන බව සඳහන්.

The Parenthood ප්‍රධාන විධායක Georgie Dent පවසන්නේ වර්තමාන ආර්ථික තත්ත්වය තුළ බොහෝ පවුල්වලට දරුවන් ඇති දැඩි කිරීමේදී ආදායම් සහ වියදම් අතර වැඩි පීඩනයකට මුහුණදීමට සිදුව ඇති බවයි.

දැනට රජයෙන් ලබාදෙන සති 26ක paid parental leave කාලය සති 52ක් දක්වා වැඩි කිරීම ඇතුළු යෝජනා ඉදිරිපත් කර ඇති බවත් වාර්තා වෙනවා.

මේ අතර ඔස්ට්‍රේලියාවේ දරුවන් ලැබීමේ අනුපාතය ඉදිරි දශක කිහිපය තුළ තවදුරටත් පහළ යනු ඇතැයි නව Intergenerational Report එකෙන්ද පුරෝකථනය කර තිබෙනවා.