සිඩ්නි නුවර 67 හැවිරිදි විශ්‍රාමික විදුලි ඉංජිනේරු Ed Darmanin, ඉලෙක්ට්‍රික් මෝටර් සයිකලයකින් ඔස්ට්‍රේලියානු මහද්වීපය වටා සංචාරය කරන පළමු පුද්ගලයා වීමට උත්සාහ කරමින් සිටිනවා.

ඔහු පසුගිය මාස තුනක කාලය තුළ කිලෝමීටර් 18,000කට ආසන්න දුරක් ගමන් කර ඇති අතර, මේ සතියේ Frankston සිට Gippsland හරහා Lakes Entrance දක්වා ගමන් කරමින් අවසන් අදියරට පැමිණ තිබෙනවා.

මෙම මෝටර් සයිකලයට අමතර බැටරියක් රැගෙන යා නොහැකි බැවින්, එක් එක් Charging Station අතර දුර ඉතා සැලකිල්ලෙන් ගණනය කරමින් ගමන් කිරීමටයි ඔහුට සිදුව ඇත්තේ.

සාමාන්‍යයෙන් පැයට කිලෝමීටර් 100ක වේගයෙන් ගියොත් එක් Charging එකකින් කිලෝමීටර් 160ක් පමණ යා හැකි නමුත්, ඇතැම් ප්‍රදේශවල ආරෝපණ ස්ථාන අතර දුර කිලෝමීටර් 260ත් 300ත් අතර වී තිබුණා.

ඒ නිසා බලශක්තිය ඉතිරි කරගැනීමට වේගය අඩු කර ගමන් කිරීමත්, සුළං තත්ත්වය අනුව ගමන පවා කල් දැමීමත් ඔහුගේ සැලසුමේ කොටසක්.

ජුනි 24දා සිඩ්නි නුවරින් ගමන ආරම්භ කළ Ed, ඔස්ට්‍රේලියානු මහද්වීපයේ සියලුම ප්‍රාන්ත සහ ප්‍රදේශ හරහා ගමන් කර නැවත සිඩ්නි වෙත පැමිණීමටයි සැලසුම් කර තිබෙන්නේ.

ඔහු පවසන්නේ මේ ගමන තම ජීවිතයේ ලොකුම අභියෝගවලින් එකක් මෙන්ම දිගු කාලයක් තිස්සේ තිබූ සිහිනයක් සැබෑ කරගැනීමක්ද බවයි.