වික්ටෝරියාවේ කුරුළු උණ පැතිරීම හේතුවෙන් බිත්තර සහ කුකුළු නිෂ්පාදනයට අදාළ නව සත්ත්ව සුබසාධන නීති ක්‍රියාත්මක කිරීම මාස 12කින් කල් දැමීමට ප්‍රාන්ත රජය තීරණය කර තිබෙනවා.

මේ වසරේ මැද සිට ක්‍රියාත්මක කිරීමට සැලසුම් කළ නීති, නව තීරණය අනුව 2027 වසරේ මැදදී හඳුන්වා දීමට නියමිතයි.

කුරුළු උණෙන් තම ගොවිපොළ ආරක්ෂා කරගැනීම සඳහා මේ අවස්ථාවේ වැඩි අවධානයක් යොමු කළ යුතු බැවින්, නව නීතිවලට සූදානම් වීමට නිෂ්පාදකයන්ට අමතර කාලයක් ලබාදෙන බවයි රජය පවසන්නේ.

මෙම නීති ජාතික සත්ත්ව සුබසාධන ප්‍රමිතීන්ට අනුකූලව සකස් කර ඇති අතර, බිත්තර දමන කිකිළියන් රඳවා තබන සාම්ප්‍රදායික කූඩු ක්‍රමය ක්‍රමයෙන් ඉවත් කිරීම එහි ප්‍රධාන අරමුණක් වෙනවා.

නීති ක්‍රියාත්මක කිරීම කල් ගියත්, සාම්ප්‍රදායික කූඩු භාවිතය 2036 වන විට අවසන් කිරීමේ ඉලක්කය වෙනස් කර නොමැති බවද වික්ටෝරියා රජය පැහැදිලි කර තිබෙනවා.

මේ අතර, කුරුළු උණ පැතිරීම වැළැක්වීම සඳහා දකුණු සහ වෙරළබඩ වික්ටෝරියාවේ කුකුළන් 50ක් හෝ ඊට වැඩි ගොවිපොළවල කුරුල්ලන් ගෘහස්ථව රඳවා තැබීමේ නියෝගය ඔක්තෝබර් මැද දක්වා දීර්ඝ කර ඇති බවයි වාර්තා වන්නේ.

නීති කල් දැමීම ගොවීන් පිළිගෙන ඇති නමුත්, සාම්ප්‍රදායික කූඩු ක්‍රමය ඉවත් කිරීමේ සැලැස්ම ගැන රජය සමඟ තවදුරටත් සාකච්ඡා කළ යුතු බව ඔවුන් සඳහන් කළා.