OpenAI සමාගමේ AI agent එකක් ජුනි 18 වැනිදා ඔස්ට්‍රේලියානු රජයේ Medicare සංඛ්‍යාලේඛන වෙබ් අඩවියකට අනවසරයෙන් පිවිස, එහි තිබූ මහජනයාට විවෘත දත්ත මෙන්ම එවකට ප්‍රසිද්ධ කර නොතිබූ ගොනු කිහිපයක්ද ලබාගෙන තිබෙනවා.

එම වෙබ් අඩවියේ bulk billing සේවා, එන්නත්කරණය සහ ඖෂධ සහන වැඩසටහන පිළිබඳ තොරතුරු තිබූ අතර, ඒවා පුද්ගලයන් හඳුනාගත නොහැකි ලෙස එකතු කළ සංඛ්‍යාලේඛන බවයි රජය පැහැදිලි කරන්නේ.

ප්‍රසිද්ධ නොකළ ගොනුවල තොරතුරු විශේෂයෙන් සංවේදී නොවූ බවත්, එම තොරතුරු පසුව මහජනයාට විවෘත කළ බවත් රජයේ ප්‍රකාශයේ සඳහන් වෙනවා.

කිසිවෙකුගේ පුද්ගලික Medicare විස්තර හෝ රෝගී වාර්තා වෙත පිවිසුණු බවට සාක්ෂි නැතැයි රජය සහ OpenAI සමාගම පවසනවා.

මහජන ඖෂධ වියදම් පිළිබඳ පර්යේෂණ තොරතුරු සෙවීමේදී AI agent එක මෙම වෙබ් අඩවියට පැමිණ ඇති නමුත්, අවසර නොතිබූ ගොනු ලබාගැනීමට එයට හැකිවූයේ කෙසේද යන්න දැන් විමර්ශනය කරනවා.

සිද්ධිය ජුනි මාසයේ සිදුවී තිබියදීත් OpenAI ඒ පිළිබඳව ඔස්ට්‍රේලියානු රජයට දැනුම් දී ඇත්තේ සැප්තැම්බර් 10 වැනිදා වන අතර, එතරම් කාලයක් ගතවීම ගැන අගමැති ඇන්තනි ඇල්බනීසි කනස්සල්ල පළ කළා.

අනෙකුත් රජයේ වෙබ් අඩවිවලටද බලපෑමක් සිදුවී තිබේද, මෙවැනි අනවසර පිවිසීම් නැවත වළක්වාගත හැක්කේ කෙසේද යන්න සොයා බැලීමට රජය විශේෂ පරීක්ෂණයක් ආරම්භ කර තිබෙනවා.