වික්ටෝරියා රජයේ ඩොලර් බිලියන 150ක් පමණ වටිනා Big Build ඉදිකිරීම් වැඩසටහනට සම්බන්ධ දූෂණ සහ අක්‍රමිකතා චෝදනා විමර්ශනය කරන රාජකීය කොමිසම හමුවේ සාක්ෂි දීමට හිටපු අගමැතිනී Jacinta Allan කැඳවීමට නියමිතයි.

ඊයේ පැවති කොමිසමේ පළමු ප්‍රසිද්ධ විභාගයේදී 2023 ජූනි මාසයේ සකස් කළ අමාත්‍ය මණ්ඩල ලේඛනයක් ඉදිරිපත් කර ඇති අතර, එහි එවකට ප්‍රවාහන හා යටිතල පහසුකම් අමාත්‍යවරිය වූ Jacinta Allanගේ නම ද සඳහන් වී තිබෙනවා.

රජයේ ඉදිකිරීම් ස්ථානවල බියගැන්වීම්, අපරාධ පසුබිමක් ඇති පුද්ගලයන් සහ outlaw motorcycle gang සාමාජිකයන් සිටි බවට වාර්තා වූ කරුණු එම ලේඛනයේ ඇතුළත් වී ඇතැයි සඳහන්.

මේ අතර ජසින්ටා ඇලන් පවසා ඇත්තේ එම විශේෂ briefing එක පිළිබඳ තමන් දැනුවත් නොවූ බවයි.

එම තොරතුරු ජසින්ටා ඇලන් වෙත ගියේද, ගියේ නම් කවදාද සහ කෙසේද යන්න කොමිසම විසින් විමර්ශනය කිරීමට නියමිත අතර ඇයට ඒ සම්බන්ධයෙන් ප්‍රතිචාර දැක්වීමට අවස්ථාව ලබාදීමට ද නියමිතයි.

මෙම රාජකීය කොමිසම අගමැති බෙන් කැරොල් විසින් ජූලි මාසයේදී බලයට පැමිණීමෙන් පසු ආරම්භ කළ අතර, CFMEU Victoria ශාඛාව සහ රජයේ විශාල ඉදිකිරීම් ව්‍යාපෘතිවල සිදුවූ බවට චෝදනා කරන දූෂණ, තර්ජන සහ අයථා ක්‍රියාකාරකම් එහි ප්‍රධාන අවධානයට ලක්වනු ඇති.

කොමිසමේ අවසන් වාර්තාව 2027 අගෝස්තු මාසයේදී ඉදිරිපත් කිරීමට නියමිතයි.