OpenAI සමාගම විසින් සංවර්ධනය කරන ලද AI Agent එකක් ඔස්ට්‍රේලියානු ෆෙඩරල් රජයට අයත් Medicare Statistics Reporting Service පද්ධතියට අවසර නොමැතිව ප්‍රවේශ වී ඇති බව අගමැති ඇන්තනී ඇල්බනීසි තහවුරු කර තිබෙනවා.

මෙම සිදුවීම 2026 ජූනි මාසයේ සිදුව ඇති අතර, අග්‍රාමාත්‍යවරයා නිව්යෝර්ක් නුවරදී මේ බව හෙළි කළා.

අදාළ සේවාව Services Australia විසින් පවත්වාගෙන යන Medicare සංඛ්‍යාලේඛන පද්ධතියක්.

මෙම අනවසර පිවිසීම සිදුව ඇත්තේ ඔස්ට්‍රේලියාව පිළිබඳ ප්‍රශ්නවලට පිළිතුරු සහ සංඛ්‍යාලේඛන සොයාගැනීමට මෙම AI නියෝජිතයා උත්සාහ කළ අවස්ථාවකදීයි.

එහිදී මහජනයාට විවෘත ගොනු පමණක් නොව, සාමාන්‍යයෙන් ප්‍රසිද්ධ නොවන ගොනු කිහිපයකට ද ප්‍රවේශ වී ඇති බව වාර්තා වනවා.

කෙසේ වෙතත්, මේ වනවිට Medicare රෝගීන්ගේ පුද්ගලික වෛද්‍ය වාර්තා හෝ වෙනත් පුද්ගලික තොරතුරු ලබාගෙන ඇති බවට සාක්ෂි නොමැති බව රජය සහ OpenAI දෙපාර්ශ්වයම පවසනවා.

අගමැති ඇල්බනීසි මේ සම්බන්ධයෙන් OpenAI CEO Sam Altman සමඟ සෘජුව කතා කර ඇති අතර, OpenAI සමාගම මේ පිළිබඳ රජයට දැනුම් දීමට මාස ගණනක් ගත කිරීම පිළිබඳව දැඩි අප්‍රසාදය පළ කර තිබෙනවා.

සිදුවීම ජූනි මාසයේ සිදුවුවත් Services Australia වෙත OpenAI දැනුම් දී ඇත්තේ මාස තුනකට පමණ පසුවයි.

AI Agent එක තවත් ඔස්ට්‍රේලියානු රජයේ වෙබ් අඩවි කිහිපයක් සමඟද සම්බන්ධ වී ඇති නමුත්, මෙතෙක් තහවුරු වී ඇති අවසර නොලත් ප්‍රවේශය Medicare statistics portal එකට පමණක් බව රජය පවසනවා.

සිද්ධියේ සම්පූර්ණ බලපෑම හඳුනාගැනීම සඳහා forensic investigation එකක්ද මේ වනවිට සිදුකරමින් තිබෙනවා.

මේ සිදුවීම පරීක්ෂා කිරීමට සහ AI Agent වැනි ස්වයංක්‍රීය තාක්ෂණයන් නිසා ඇතිවිය හැකි cyber security අවදානම් සඳහා දැනට ඇති රජයේ ආරක්ෂක ක්‍රම ප්‍රමාණවත්දැයි සොයා බැලීමට විශේෂ විශේෂ කාර්ය සාධක බලකායක් ද පිහිටුවීමට රජය තීරණය කර තිබෙනවා.