ඔස්ට්‍රේලියාවේ ප්‍රධාන පෙළේ නිවාඩු නිකේතන සහ මහල් නිවාස සංකීර්ණයක් වන Quest (Quest Apartment Hotels) ආයතනයේ සිදුවූ බරපතල දත්ත මංකොල්ලයක් හේතුවෙන් මිලියන දෙකකට ආසන්න පාරිභෝගිකයින්ගේ පුද්ගලික තොරතුරු අනාරක්ෂිත වී තිබෙනවා.

පසුගිය අගෝස්තු මාසයේදී අනාවරණය වූ මෙම සයිබර් ප්‍රහාරය සම්බන්ධයෙන් සිදු කරන ලද පුළුල් පරීක්ෂණයකින් හෙළි වී ඇත්තේ පාරිභෝගිකයින් 1,991,613 දෙනෙකුගේ දත්ත මේ සඳහා නිරාවරණය වී ඇති බවයි.

මීට මූලික වශයෙන් නම් සහ සම්බන්ධතා තොරතුරු ඇතුළත් වුවද, Passports සහ රියදුරු බලපත්‍ර අංක මෙන්ම ක්‍රෙඩිට් කාඩ්පත් දත්ත ද මීට ඇතුළත් වන බවයි වැඩිදුර පරීක්ෂණවලදී තහවුරු වී ඇත්තේ.

හඳුනාගත් අනන්‍යතා ලියකියවිලිවල මුල් පිටපත් හෝ ස්කෑන් කළ පිටපත් කාන්දු වී නොමැති බව සමාගම අවධාරණය කළද, බලපෑමට ලක්වූ පාරිභෝගිකයින්ට තම විදේශ ගමන් බලපත්‍ර සහ රියදුරු බලපත්‍රවල තත්ත්වය අදාළ බලධාරීන් හරහා වහාම පරීක්ෂා කර බලා අවශ්‍ය පියවර ගන්නා ලෙස උපදෙස් දී තිබෙනවා.

කෙසේ වෙතත් Australian Passport Office පවසන්නේ මෙම දත්ත කඩවීම නිසා පමණක් ඔස්ට්‍රේලියානු ගමන් බලපත්‍රයක් අනිවාර්යයෙන්ම මාරු කිරීමට අවශ්‍ය නොවන බවයි.

මේ අතර මෙම සිද්ධිය තෙවන පාර්ශ්ව සේවා සැපයුම්කරුවෙකුගේ පද්ධතියක දුර්වලතාවක් හරහා සිදුව ඇතැයි ද බලපෑමට ලක්වූ පාරිභෝගිකයින්ගෙන් සමාව ඉල්ලා සිටින බව ද Quest සඳහන් කර තිබෙනවා.