වික්ටෝරියා ප්‍රාන්ත මැතිවරණයට තවත් මාස දෙකකට ආසන්න කාලයක් තිබියදී, One Nation පක්ෂයට ලැබෙන ජනතා සහය ඉහළ යාම තමන්ට “බියක් ඇති කරන” බව අගමැති බෙන් කැරොල් ප්‍රකාශ කර තිබෙනවා.

ABC වාර්තාවට අනුව, සැප්තැම්බර් මාසයේදී ඡන්දදායකයින් 2,400කට ආසන්න පිරිසක් ඇසුරින් සිදුකළ Redbridge සමීක්ෂණයකදී Coalition සඳහා 29%ක, One Nation සඳහා 25%ක සහ Labor සඳහා 24%ක ප්‍රාථමික ඡන්ද සහයක් වාර්තා වී තිබෙනවා.

කැරොල් පවසන්නේ නොවැම්බර් මැතිවරණයෙන් පසු Liberal Party සහ One Nation එක්ව රජයක් පිහිටුවීමේ හැකියාව පිළිබඳව තමන් දැඩි ලෙස සැලකිලිමත් වන බවයි.

එහෙත් තම අවධානය වෙනත් පක්ෂ සමඟ ගනුදෙනු කිරීමකට නොව, Coalition බහුතර ආණ්ඩුවක් පිහිටුවීම සඳහා ඡන්දය දිනාගැනීම කෙරෙහි බවයි Victorian Liberal නායිකා Jess Wilson සඳහන් කර ඇත්තේ.

මේ අතර මෙවර වැඩි අවධානයක් යොමුව ඇත්තේ මෙල්බන් බටහිර ප්‍රදේශයේ දීර්ඝ කාලයක් Labor පක්ෂයේ බලකොටුවක් ලෙස සැලකුණු ආසනවලටයි.

විශේෂයෙන් Melton, Sunbury සහ Werribee වැනි ප්‍රදේශවල ජනගහන වර්ධනයට සාපේක්ෂව ප්‍රවාහන හා වෙනත් යටිතල පහසුකම් ප්‍රමාණවත් වේගයකින් සංවර්ධනය නොවූ බවට ජනතාව අතර අප්‍රසාදයක් පවතින බව දේශපාලන විශ්ලේෂකයින් සඳහන් කරනවා.

Melton ආසනය දැනට Labor පක්ෂය සතුව ඇත්තේ 4.6%ක margin එකකින් වන අතර, Labor මන්ත්‍රී Stephen McGhie මෙවර ඉවත් වීමත් සමඟ එම ආසනය දැඩි තරගකාරී ප්‍රදේශයක් බවට පත්ව තිබෙනවා.

වික්ටෝරියා ප්‍රාන්ත මැතිවරණය 2026 නොවැම්බර් 28 වනදා පැවැත්වීමට නියමිතයි.