වික්ටෝරියා ප්‍රාන්තයේ අපරාධ අනුපාතය පසුගිය වසර තුළ 3.8%කින් අඩු වී තිබුණත්, වික්ටෝරියා පොලිසිය තවමත් නිලධාරීන්ගේ හිඟයකට මුහුණ දෙමින් සිටින බව නව දත්ත අනුව වාර්තා වෙනවා.

අගෝස්තු 31 වනවිට වික්ටෝරියා පොලිසියේ පූර්ණකාලීන පොලිස් තනතුරු 1,340ක් පමණ පුරප්පාඩුව පැවති බව එම දත්තවල සඳහන් වෙනවා.

මෙම තත්ත්වය වාර්තා වන්නේ වික්ටෝරියා ප්‍රාන්තයේ සමස්ත අපරාධ අනුපාතය අඩුවෙමින් පවතින පසුබිමක වන අතර, පසුගිය වසරේ තරුණ අපරාධ ක්‍රියාකාරකම්ද 8.1%කින් පහළ ගොස් තිබෙනවා.

එම කාලය තුළ නිවාසවලට බලහත්කාරයෙන් ඇතුළුවීමේ සිද්ධි 27%කින්, වාහන පැහැරගැනීම් 25%කින් සහ කොල්ලකෑම් 22%කින් පමණ අඩු වී ඇති බව නව සංඛ්‍යාලේඛන පෙන්වා දෙනවා.

කෙසේ වෙතත්, මත්ද්‍රව්‍ය ජාවාරම් සහ බෙදාහැරීම් සම්බන්ධයෙන් අත්අඩංගුවට ගැනීම් 18.5%කින් ඉහළ ගොස් ඇති අතර, වෙළඳසැල්වලින් සිදුකරන සොරකම්ද 2.7%කින් වැඩි වී තිබෙනවා.

මේ අතර වික්ටෝරියා ප්‍රාන්තයේ අපරාධ මට්ටම පසුගිය වසරට වඩා අඩු වී තිබුණත්, වසර තුනකට පෙර පැවති මට්ටමට සාපේක්ෂව තවමත් 13%කට වැඩි බව පොලිසිය පෙන්වා දෙනවා.

වික්ටෝරියා පොලිසියේ පුරප්පාඩු පවතින පසුබිමක, අපරාධ මර්දනය සඳහා තවත් පොලිස් නිලධාරීන් 1,500ක් බඳවා ගැනීමට සැලසුම් කර ඇති බවත් වාර්තා වන අතර, ඉදිරියේදී පොලිස් සේවාව තවදුරටත් ශක්තිමත් කිරීම කෙරෙහි අවධානය යොමු වී තිබෙනවා.