නිවාස වියදම අඩු කරගැනීමට නගරයෙන් පිටත පදිංචි වූ පවුල්වලට, ඉහළ යන ඉන්ධන මිල දැන් අලුත් බරක් වී ඇති බව අද වාර්තා කරනවා. 

දකුණු Tasmaniaහි ජීවත් වන කේට් ගොටොව්ස්කි රැකියාවට යාම සහ දරුවන් පාසලට ගෙන යාම වෙනුවෙන් දිනකට පැය දෙකකට ආසන්න කාලයක් රිය පදවන අතර, ඒ සඳහා සතියකට ඩොලර් 150ක් දක්වා ඉන්ධන සඳහා වැය කරන බවයි පවසන්නේ.

ඇය වැඩිදුරටත් කියාසිටියේ අත්‍යවශ්‍ය ගමන්වලට මුල් තැන දීමට සිදුවීම නිසා පවුලක් ලෙස කරන වෙනත් ක්‍රියාකාරකම් සහ වියදම් ගැන දිනපතා තීරණ ගන්නා බවයි.

New South Walesහි ප්‍රාදේශීය ප්‍රදේශවලට ජලය ප්‍රවාහනය කරන ඩේව් හෙන්රි පවසන්නේ ඩීසල් ලීටරයක මිල ඩොලර් තුනකට ආසන්න වීම තම ව්‍යාපාරයේ ලාභයට බලපා ඇති බවයි.

ඊට අමතර වියදම පාරිභෝගිකයන්ගෙන් අය කිරීමට ඔහුට සිදුව ඇති නමුත්, නියඟය නිසා දැනටමත් පීඩාවට පත්ව සිටින පවුල්වලට ජලය මිලදී ගැනීමත් අපහසු වෙමින් පවතිනවා.

ප්‍රතිපත්ති විශේෂඥ ඇන්ඩෲ හෙන්ඩර්සන් පෙන්වා දෙන්නේ රැකියාව, පාසල සහ අනෙකුත් අවශ්‍යතා සඳහා වැඩි දුරක් ගමන් කිරීමට සිදුවන බැවින් ඉන්ධන මිල ඉහළ යාම ප්‍රාදේශීය ජනතාවට වැඩි බලපෑමක් ඇති කරන බවයි.

ඉන්ධන ගබඩා පහසුකම් බොහොමයක් වෙරළබඩ ප්‍රදේශවල පිහිටා ඇති නිසා, ප්‍රාදේශීය ප්‍රදේශවල ගබඩා ධාරිතාව වැඩි කිරීම සැපයුම් අවදානම අඩු කිරීමට උපකාරී විය හැකි බවද ඔහු පවසනවා.