ඇමෙරිකාවේ විස්කොන්සින්–මැඩිසන් විශ්වවිද්‍යාලය ආසන්නයේ ශිෂ්‍ය සංගම් නිවසක පහළ මාලයෙන්, සිරුරුවල ආහාර සහ වෙනත් දියර තැවරුණු තරුණයන් 30 දෙනෙකු පමණ හමුවීමත් සමඟ බරපතළ නවක වද චෝදනා පිළිබඳ පොලිස් විමර්ශනයක් ආරම්භ වී තිබෙනවා.

සැප්තැම්බර් 23 රාත්‍රියේ ලැබුණු නිර්නාමික තොරතුරක් මත පොලිසිය එම ස්ථානයට පැමිණෙන විට, බහුතරයක් 18 හැවිරිදි තරුණයන් අර්ධ වශයෙන් ඇඳුම් ඇඳ සිටි බවයි වාර්තා වන්නේ.

කිහිපදෙනෙකුගේ සිරුරුවල ශාරීරික පහරදීමකට ගැළපෙන තුවාල පැහැදිලිව දක්නට ලැබුණු බවත්, කාමරය තුළ උණුසුම් සහ තෙතමනය සහිත තත්ත්වයක් පැවති බවත් පොලිසිය පවසනවා.

පොලිසිය එම ක්‍රියාකාරකම නතර කර සියලු දෙනා පිටතට රැගෙන තුවාල සහ සෞඛ්‍ය තත්ත්වය පරීක්ෂා කළද, කිසිවෙකු රෝහල් ප්‍රතිකාර සඳහා රැගෙන ගොස් නැහැ.

සිද්ධිය සම්බන්ධයෙන් Alpha Epsilon Pi සංගමයේ 20 හැවිරිදි සභාපතිවරයා සහ උපසභාපතිවරයා නවක වදය හා කලහකාරී හැසිරීම පිළිබඳ සැකපිට අත්අඩංගුවට ගෙන තිබෙනවා.

එහි සිටි පිරිසෙන් ලැබුණේ සීමිත සහයෝගයක් බවත්, ඇතැම් ප්‍රකාශ එකිනෙකට පරස්පර වූ බවත් සඳහන් කරන පොලිසිය, වැඩිදුර තොරතුරු ඇති අයට ඉදිරිපත් වන ලෙස ඉල්ලා සිටිනවා.

මෙම සංගමයට විශ්වවිද්‍යාල පිළිගැනීම 2015දී අහිමි වී තිබූ අතර, සිද්ධියට සම්බන්ධ සිසුන් නීති හෝ විශ්වවිද්‍යාල නියමයන් උල්ලංඝනය කර ඇති බව තහවුරු වුවහොත් පන්ති තහනමේ සිට විශ්වවිද්‍යාලයෙන් ඉවත් කිරීම දක්වා විනය ක්‍රියාමාර්ගවලට මුහුණ දිය හැකියි.