ක්වීන්ස්ලන්ඩ්හි Brisbane සිට ලොන්ග්‍රීච් දක්වා ගොස් ආපසු පැමිණීමට ගුවන් ටිකට් පතක් සොයා බැලූ ජෝන් එලියට්ට ඩොලර් 1,386ක ගාස්තුවක් දැකගැනීමට ලැබී තිබෙනවා. 

දින පහකට කලින් වෙන්කරවා ගැනීමට උත්සාහ කළ පැය දෙකහමාරක පමණ මේ ගමනේ මිල, අවසන් මොහොතේ Auckland බලා යන ගුවන් ගමනක මිලට සමාන බවයි ඔහු පෙන්වා දෙන්නේ.

මෙතරම් ඉහළ ගාස්තු නිසා ප්‍රදේශවාසීන්ට ගමන් කිරීම අපහසු වන අතර සංචාරකයන්ටද බටහිර ක්වීන්ස්ලන්ඩ්වලට පැමිණීම අධෛර්යමත් වන බව ඔහු පවසනවා.

තවත් ප්‍රාදේශීය නගරයක් වන චාර්ලෙවිල් හි නගරාධිපතිවරයා පවසන්නේ, ගුවන් යානාවල ආසන නොලැබීම නිසා එහි පැවැත්වීමට සැලසුම් කළ සෞඛ්‍ය සේවා කටයුතු පවා කල් දැමීමට සිදුව ඇති බවයි. 

ප්‍රාදේශීය ගුවන් සේවා ගිවිසුම් පිළිබඳ ක්වීන්ස්ලන්ඩ් රජයේ සමාලෝචනය වසරකින් කල් දැමීම නිසා, වැඩි ගුවන් ගමන් සහ අඩු ගාස්තු ලබාගැනීම තවත් ප්‍රමාද වනු ඇතැයි ප්‍රාදේශීය නියෝජිතයන් කනස්සල්ල පළ කරනවා.

Qantas සමාගම පෙන්වා දෙන්නේ කුඩා හා දුරස්ථ ප්‍රදේශවලට පියාසර කරන යානාවල ආසන අඩු බැවින් එක් මගියෙකු වෙනුවෙන් වැය වන මෙහෙයුම් මුදල විශාල ගුවන් යානාවලට වඩා වැඩි බවයි.

ගාස්තු නියම වන ආකාරය වඩා පැහැදිලි කරන ලෙස මගීන් ඉල්ලා සිටින අතර, ඔස්ට්‍රේලියාවේ ඵලදායිතා කොමිසමද ප්‍රාදේශීය ගුවන් ගාස්තු පිළිබඳ වෙනම විමර්ශනයක් සිදු කරමින් සිටිනවා.