නාසි ආචාරයක් සිදු කිරීම සහ අන්තර්ජාලය ඔස්සේ අපහාසාත්මක හා තර්ජනාත්මක පණිවුඩ පළ කිරීම සම්බන්ධයෙන් සිඩ්නි වැසියෙකුට වසර 3ක සිරදඬුවමක් නියම කර තිබෙනවා.

Nathan Ballesty නමැති මෙම පුද්ගලයාට නාසි ආචාරය කිරීම සම්බන්ධයෙන් නව අනිවාර්ය අවම දඬුවම් නීති (Mandatory minimum sentencing laws) යටතේ සිරදඬුවම් ලැබූ පළමු පුද්ගලයා ද වනවා.

අග්‍රාමාත්‍ය ඇන්තනි ඇල්බනීසි පැහැරගෙන යා යුතු බවට ඔහු පළ කළ අන්තර්ජාල සටහනක් සම්බන්ධයෙන් ඔස්ට්‍රේලියානු ෆෙඩරල් පොලිසිය පරීක්ෂණයක් ආරම්භ කිරීමෙන් පසු ඔහු අත්අඩංගුවට ගෙන තිබුණා.

සිඩ්නි උතුරු වෙරළ ප්‍රදේශයේ පිහිටි ඔහුගේ නිවස පරීක්ෂා කිරීමේදී නාසි ඇඳුමක් සහ ඇඩොල්ෆ් හිට්ලර්ගේ Mein Kampf ග්‍රන්ථයේ පිටපතක් ඇතුළු නාසි සංකේත සොයාගෙන තිබෙනවා.

මේ අතර ඔහුගේ ඉලෙක්ට්‍රොනික උපකරණවල තිබී අග්‍රාමාත්‍යවරයා සහ ස්වදේශ කටයුතු අමාත්‍ය ටෝනි බර්ක් ඉලක්ක කරගත් ප්‍රචණ්ඩ පණිවුඩ සහ වීඩියෝ ඇමතුමකදී Nazi salute එකක් කරන දර්ශන ද සොයාගෙන තිබෙනවා.

ඔහු නාසි ආචාරය කිරීම ඇතුළු චෝදනා කිහිපයකට වරද පිළිගෙන තිබූ අතර, අධිකරණය විසින් වසර තුනක සිරදඬුවමක් සහ අවම වශයෙන් මාස 18ක සිරගත කාලයක් නියම කර තිබෙනවා.

මෙම දඬුවමට නාසි ආචාරය කිරීම සම්බන්ධයෙන් නීතියෙන් නියම කර ඇති අනිවාර්ය මාස 12ක අවම සිරදඬුවම ද ඇතුළත්.

මේ අතර ඔහුගේ මව්පියන් අධිකරණයට දන්වා සිටියේ තම පුත්‍රයා දිගුකාලීන මානසික සෞඛ්‍ය ගැටලු සහ සමාජීය හුදකලාවකින් පසු වූ අතර, අන්තර්ජාලයට වැඩි වශයෙන් ඇබ්බැහි වීම සම්බන්ධයෙන් කණගාටු වන බවයි.

කෙසේ වෙතත්, ඔහුගේ ක්‍රියාවන් සහ ඉදිරිපත් කළ චරිත සහතික අතර විශාල පරස්පරතාවක් පවතින බවයි විනිසුරුවරයා සඳහන් කළේ.

ඔහු 2027 මැයි මාසයේදී පරිවාස නිදහස සඳහා සුදුසුකම් ලැබීමට නියමිතයි.