ඔස්ට්‍රේලියාවේ නව ජාතික හදිසි අනතුරු ඇඟවීමේ පද්ධතිය වන AusAlert අද සිට ක්‍රියාත්මක වීමට නියමිත අතර, හදිසි අවස්ථාවකදී ජනතාවගේ ජංගම දුරකථන වෙත සෘජුවම අනතුරු ඇඟවීම් යැවීමට මෙය භාවිතා කරනවා.

මෙම පද්ධතිය හරහා bushfire, ගංවතුර, දැඩි කුණාටු සහ වෙනත් බරපතළ හදිසි තත්ත්වයන් ඇති ප්‍රදේශවල සිටින අනුකූල ජංගම දුරකථන, ටැබ්ලට් සහ smart watch වෙත අනතුරු ඇඟවීම් යැවීමට හැකියාව තිබෙනවා.

AusAlert සඳහා වෙනම ලියාපදිංචි වීමක් හෝ application එකක් download කිරීමක් අවශ්‍ය නොවන අතර, අදාළ ප්‍රදේශයක සිටින අනුකූල උපාංග වෙත ජංගම දුරකථන ජාලය හරහා අනතුරු ඇඟවීම ස්වයංක්‍රීයව ලැබෙනවා.

විශේෂයෙන්ම ඉහළම අවදානම් මට්ටමක් ලෙස සැලකෙන Critical Alert එකක් ලැබුණු විට දුරකථනය silent හෝ Do Not Disturb තත්ත්වයේ තිබුණත් ශබ්දයක් සහ කම්පනයක් සමඟ අනතුරු ඇඟවීම පෙන්වන අතර, එය දුරකථනයේ settings හරහා අක්‍රිය කළ නොහැකියි.

ඒ වෙනුවට Priority Alert ලෙස හඳුන්වන අඩු මට්ටමේ අනතුරු ඇඟවීම් සඳහා දුරකථනයේ settings හරහා ශබ්දය හෝ notification එක වෙනස් කිරීමට අවස්ථාව තිබෙනවා.

ජාතික AusAlert පරීක්ෂණය පසුගිය ජූලි මාසයේදී සිදුකර තිබූ අතර, එහිදී අනුකූල උපාංග වෙත Critical Alert එකක් යවා පද්ධතියේ ක්‍රියාකාරීත්වය පරීක්ෂා කර තිබුණා.

නව පද්ධතියේ අරමුණ හදිසි අවස්ථාවකදී අනතුර ඇති ස්ථානය, අවදානමේ ස්වභාවය සහ ජනතාව ගත යුතු ක්‍රියාමාර්ග පිළිබඳ තොරතුරු ඉක්මනින් ලබාදීම වන අතර, ජනතාවට නිල හදිසි තොරතුරු සහ බලධාරීන්ගේ උපදෙස්ද අඛණ්ඩව අනුගමනය කරන ලෙස දැනුම් දී තිබෙනවා.