ඔස්ට්‍රේලියානුවන්ගෙන් බහුතරයක් තම විවාහ සහ ආදර සබඳතා පිළිබඳව සතුටින් සිටියත්, මූල්‍ය පීඩනය එම සබඳතාවලට බලපාන ප්‍රධාන කරුණක් බව නව පර්යේෂණයකින් හෙළි වී තිබෙනවා.

University of Melbourne විසින් HILDA Survey දත්ත විශ්ලේෂණය කර කළ මෙම පර්යේෂණයට අනුව, ඔස්ට්‍රේලියානු යුවළයන් තම සම්බන්ධතාවේ ගුණාත්මකභාවය සාමාන්‍යයෙන් ලකුණු 4.3ක් ලෙස, ලකුණු 5ක උපරිමයකින් තක්සේරු කර තිබෙනවා.

පිරිමි පුද්ගලයන්ගෙන් සියයට 72.6ක් සහ කාන්තාවන්ගෙන් සියයට 67.5ක් තම සහකරුට හෝ සහකාරියට ඉතා දැඩි ලෙස ආදරය කරන බව සඳහන් කර තිබෙනවා.

කෙසේ වෙතත් නිවාස ණය, කුලී ගාස්තු සහ ජීවන වියදම වැනි වියදම් හේතුවෙන් ඇතිවන දැඩි මූල්‍ය පීඩනය සබඳතාවයක සතුටට බලපාන ප්‍රධාන සාධකය බව පර්යේෂණයෙන් පෙන්වා දෙනවා.

දරුවන් නිවසේ සිටීමද සබඳතාවලට බලපාන තවත් වැදගත් කරුණක් වන අතර, විශේෂයෙන්ම අවුරුදු 4ත් 7ත් අතර වයසේ කුඩා දරුවන් සිටින පවුල්වල සබඳතා සම්බන්ධයෙන් අඩු තෘප්තිමත් මට්ටම් වාර්තා වී තිබෙනවා.

සම්බන්ධතාව ආරම්භ කළ මුල් කාලයෙන් පසුව එහි ගුණාත්මකභාවය ක්‍රමයෙන් අඩුවී, එකට ජීවත් වීම ආරම්භ කර වසර 24කට පමණ පසුව එය පහළම මට්ටමකට පැමිණෙන බවත්, ඉන් පසුව නැවත ඉහළ යන බවත් HILDA දත්ත පෙන්වා දෙනවා.

කෙසේ වෙතත් පර්යේෂකයන් පෙන්වා දෙන්නේ සමස්තයක් ලෙස ඔස්ට්‍රේලියානු යුවළයන්ගෙන් බහුතරයක් දුෂ්කර කාලයන් පසුකරමින් වුවද තම සබඳතා පවත්වාගෙන යන බවයි.