ආබාධ සහිත පුද්ගලයන් සඳහා ක්‍රියාත්මක NDIS වැඩසටහන සම්බන්ධයෙන් ඉදිරිපත් කර ඇති බරපතළ පැමිණිලි 13,000කට ආසන්න ප්‍රමාණයක් තවමත් විසඳීමට බලා සිටින බව වාර්තා වී තිබෙනවා.

විශේෂයෙන්ම අපයෝජනය, නොසලකා හැරීම සහ මුදල් වංචා සම්බන්ධයෙන් ඉදිරිපත් කර ඇති පැමිණිලි අතරින් කිහිපයක් සඳහා ප්‍රතිචාර ලැබීමට මාස ගණනක් ගත වී ඇති බවයි වාර්තා වන්නේ.

පසුගිය මාර්තු මාසයේදී විසඳීමට ඉතිරිව තිබූ පැමිණිලි සංඛ්‍යාව 15,000කට වැඩි වූ අතර, මේ වනවිට එය 13,000කට ආසන්න මට්ටමකට අඩු වී තිබෙනවා.

එහෙත් බරපතළ සිදුවීම් සම්බන්ධයෙන් පැමිණිලි කළ ඇතැම් පුද්ගලයන් පවසන්නේ ඒවා සම්බන්ධයෙන් කඩිනමින් පියවර ගත යුතු වුවත්, ප්‍රතිචාර ලැබීමට දිගු කාලයක් ගතවී ඇති බවයි.

එක් සිදුවීමකදී පැමිණිල්ල සම්බන්ධයෙන් කටයුතු කිරීමට නිලධාරියෙකු පත් කිරීමට පමණක් මාස හතරක පමණ කාලයක් ගත වූ බවද වාර්තා වී තිබෙනවා.

මේ අතර NDIS ආරක්ෂණ කොමිසම පවසන්නේ ලැබෙන පැමිණිලිවල බරපතළභාවය, හදිසිභාවය සහ සංකීර්ණත්වය සලකා ඒවාට ප්‍රමුඛතාව ලබාදෙමින් කටයුතු කරන බවයි.

කෙසේ වෙතත් NDIS සේවාව භාවිත කරන පුද්ගලයන්ගේ ආරක්ෂාව තහවුරු කිරීම සඳහා බරපතළ පැමිණිලි සම්බන්ධයෙන් කඩිනම් පියවර ගැනීමේ අවශ්‍යතාව පිළිබඳව මේ වනවිට වැඩි අවධානයක් යොමුව තිබෙනවා.