ඔස්ට්‍රේලියාවේ ප්‍රධාන supermarket ජාල වන Coles සහ Woolworths විසින් වෙළෙඳසැල් ආරක්ෂාව වැඩි කිරීම සඳහා Facial Recognition Technology පරීක්ෂා කර තිබීමත් සමඟ පාරිභෝගික පෞද්ගලිකත්වය ගැන අවධානය යොමුව තිබෙනවා.

මෙම තාක්ෂණය පුද්ගලයෙකුගේ මුහුණේ ලක්ෂණ හඳුනාගෙන ඒවා digital code එකක් බවට පත් කර, වෙනත් දත්ත සමඟ සැසඳීමට භාවිත කළ හැකි තාක්ෂණයක් බව සඳහන් වෙනවා.

Supermarket කර්මාන්තයේ පාර්ශ්ව පවසන්නේ මෙවැනි තාක්ෂණයක් භාවිත කිරීමේ ප්‍රධාන අරමුණ පාරිභෝගිකයන් සහ සේවකයන්ගේ ආරක්ෂාව වැඩි කිරීම සහ වෙළෙඳසැල් තුළ සිදුවන අපරාධ පාලනය කිරීම බවයි.

කෙසේ වෙතත්, තාක්ෂණ විශේෂඥයන් පෙන්වා දෙන්නේ මුහුණු හඳුනාගැනීම වැනි තාක්ෂණයක් භාවිතයට ගැනීමෙන් පසුව එය මුල් අරමුණෙන් ඔබ්බට වෙනත් කාර්යයන් සඳහා භාවිත වීමේ අවදානමක් තිබිය හැකි බවයි.

මේ අතර Australia Privacy Commissioner විසින් retail stores වැනි මහජනයා බහුලව පැමිණෙන ස්ථානවල Facial Recognition Technology භාවිතය සම්බන්ධයෙන් 2026 ජූලි මාසයේ නව මාර්ගෝපදේශද නිකුත් කර තිබෙනවා.

එම මාර්ගෝපදේශ අනුව biometric information ලෙස සැලකෙන මුහුණු දත්ත එකතු කිරීම සම්බන්ධයෙන් පෞද්ගලිකත්ව නීති දැඩිව සැලකිල්ලට ගත යුතු අතර, තාක්ෂණය භාවිත කරන සෑම අවස්ථාවක්ම වෙන වෙනම නීතිමය වශයෙන් තක්සේරු කළ යුතු බව සඳහන් කර තිබෙනවා.

දැනට Coles සහ Woolworths දෙකම මෙම තාක්ෂණය ඔස්ට්‍රේලියාවේ සියලුම supermarket වෙත පුළුල් ලෙස හඳුන්වා දෙන බව නිවේදනය කර නැති අතර, ඒ නිසා ඉදිරියේදී පාරිභෝගික පෞද්ගලිකත්වය සහ ආරක්ෂාව අතර සමබරතාවය පිළිබඳ සාකච්ඡාව තවදුරටත් ඉදිරියට යනු ඇති බවයි වාර්තා වෙන්නේ.