ඔස්ට්‍රේලියානු ජාතික ව්‍යාපාරිකයෙකුට අයත් සමාගම් කොටස් අයුතු ලෙස පරිහරණය කර රුපියල් මිලියන 21ක සාපරාධී විශ්වාසය කඩ කළ බවට චෝදනා ලබා සිටි හිටපු අමාත්‍ය උදය ගම්මන්පිල එම චෝදනාවලින් නිදොස් කොට නිදහස් කිරීමට කොළඹ මහාධිකරණය නියෝග කර තිබෙනවා.

දීර්ඝ නඩු විභාගයකින් අනතුරුව කොළඹ මහාධිකරණ විනිසුරු නදී අපර්ණා සුවඳුරුගොඩ විසින් මෙම තීන්දුව ලබා දී තිබෙනවා.

තීන්දුව ප්‍රකාශයට පත් කරමින් විනිසුරුවරිය සඳහන් කර ඇත්තේ, උදය ගම්මන්පිල ට එරෙහිව පැමිණිල්ල විසින් ඉදිරිපත් කළ චෝදනා සාධාරණ සැකයෙන් ඔබ්බට ඔප්පු කිරීමට පැමිණිල්ල සමත් වී නොමැති බවයි.

ඒ අනුව, විත්තිකරු වන උදය ගම්මන්පිල නිදොස් කොට නිදහස් කිරීමට අධිකරණය නියෝග කර තිබෙනවා.

මෙම නඩුව ගොනු කර තිබුණේ යහපාලන රජය පැවති සමයේදීයි.

ඔස්ට්‍රේලියානු ජාතික ව්‍යාපාරිකයෙකු වන බ්‍රයන් ෂැඩික් ට අයත් සමාගම් කොටස් ව්‍යාජ ඇටෝර්නි බලපත්‍ර භාවිත කර අලෙවි කිරීමෙන් රුපියල් මිලියන 21ක සාපරාධී විශ්වාසය කඩ කළ බවට උදය ගම්මන්පිල ට එරෙහිව චෝදනා එල්ල කර තිබුණා.

කෙසේ වෙතත්, දීර්ඝ නඩු විභාගයකින් අනතුරුව අධිකරණය තීරණය කර ඇත්තේ එම චෝදනා සාධාරණ සැකයෙන් ඔබ්බට ඔප්පු වී නොමැති බවයි.

ඒ අනුව, උදය ගම්මන්පිල ට එරෙහි නඩුවෙන් ඔහු නිදොස් කොට නිදහස් කර තිබෙනවා.