Australian Taxation Office නව වාර්තාවකට අනුව 2024–25 මූල්‍ය වර්ෂයේ වාර්තා කළ විශාල සමාගම් 4,299 අතරින් සමාගම් 1,149ක් හෙවත් සියයට 27ක් ආදායම් බදු ගෙවා නොමැති බව හෙළි වී තිබෙනවා.

එම වසරේ බදු ගෙවූ විශාල සමාගම් සංඛ්‍යාව 3,150ක් වන අතර, එය සමස්ත සමාගම් සංඛ්‍යාවෙන් සියයට 73ක් බව ATO දත්ත පෙන්වා දෙනවා.

බදු නොගෙවූ සමාගම් අතරින් ඇතැම් සමාගම් ගිණුම්ගත පාඩු වාර්තා කර තිබීමත්, තවත් සමාගම් බදු සහන සහ වෙනත් නීත්‍යානුකූල අඩු කිරීම් භාවිත කර තිබීමත් හේතුවෙන් ඔවුන්ගේ බදු ගෙවිය යුතු මුදල බිංදුව දක්වා අඩු වී ඇති බව ATO පවසනවා.

ඒ අනුව සමාගමක් කිසිදු ආදායම් බද්දක් නොගෙවීමෙන් පමණක් එම සමාගම නීතිය උල්ලංඝනය කර ඇති බව අදහස් නොවන බවත්, ඇතැම් අවස්ථාවල එය නීත්‍යානුකූල බදු ක්‍රමවේදයන් යටතේ සිදුවිය හැකි බවත් ATO අවධාරණය කර තිබෙනවා.

මේ අතර 2024–25 වසරේ විශාල සමාගම්වලින් ලබාගත යුතු සමස්ත ආදායම් බදු ප්‍රමාණය පෙර වසරට සාපේක්ෂව ඩොලර් බිලියන 8.2කින් හෙවත් සියයට 8.6කින් අඩුවී ඩොලර් බිලියන 87.5ක් වී තිබෙනවා.

ATO පවසන්නේ විදේශීය මූල්‍ය පහසුකම් සහ විදේශීය අලෙවි මධ්‍යස්ථාන භාවිත කරන සමාගම් ඇතුළු ව්‍යාපාරවල බදු කටයුතු තවදුරටත් පරීක්ෂා කරන අතර, වේගයෙන් වර්ධනය වන කෘත්‍රිම බුද්ධි සහ දත්ත මධ්‍යස්ථාන ක්ෂේත්‍ර කෙරෙහිද අවධානය යොමු කර ඇති බවයි.

කෙසේ වෙතත් මෙම වාර්තාවේ ආවරණය වන විශාල සමාගම් අතර බදු නොගෙවූ ප්‍රතිශතය 2013–14 වසරේ සියයට 36ක් වූ අතර, 2024–25දී එය සියයට 27ක් දක්වා පහළ ගොස් ඇති බවත් ATO පෙන්වා දෙනවා.

#ATO #CompanyTax #TaxNews #AustralianTaxation #BigBusiness #BusinessNews #TaxAustralia