වික්ටෝරියා ප්‍රාන්තයට ඉදිරි දින කිහිපයේදී දැඩි වැසි තත්ත්වයක් ඇතිවිය හැකි අතර, ඇතැම් ප්‍රදේශවලට මිලිමීටර් 100ක් දක්වා වැසි ලැබිය හැකි බවට කාලගුණ විද්‍යා දෙපාර්තමේන්තුව (BOM) අනතුරු ඇඟවීමක් කර තිබෙනවා.

මෙල්බන් නගරයේ සාමාන්‍ය ඔක්තෝබර් මාසයක සම්පූර්ණ වර්ෂාපතනය මෙන් වැඩි ප්‍රමාණයක් මෙලෙස දින කිහිපයක් ඇතුළත ලැබෙනු ඇති බවයි  ඔවුන් පෙන්වා දෙන්නේ.

විශේෂයෙන් වයඹදිග මෙල්බන් ප්‍රදේශවල දැඩි ගිගුරුම් සහිත වැසි සමඟ හදිසි ගංවතුර ඇතිවීමේ අවදානමක් ද පවතිනවා.

නිවර්තන කලාපීය සම්බන්ධතාවක් සහිත මෙම වැසි වලාකුළු පද්ධතිය බටහිර උපනගර හරහා මෙල්බන් වෙත ළඟා වෙමින් පවතින බව කාලගුණ විද්‍යාඥයන් පවසනවා.

Gippsland, North East සහ Central Victoria ඇතුළු ප්‍රදේශ කිහිපයක ගංවතුර අවදානම පිළිබඳව අවධානය යොමු කර ඇති අතර, දැනටමත් තෙත් වී ඇති ගංගා පෝෂක ප්‍රදේශවල ජල මට්ටම් ඉක්මනින් ඉහළ යා හැකියි.

මේ අතර පාසල් නිවාඩුව හේතුවෙන් කඳවුරු බැඳීම හෝ කඳු නැගීම සඳහා පිටත්වන පවුල්වලට කාලගුණ අනතුරු ඇඟවීම් නිරන්තරයෙන් පරීක්ෂා කරන ලෙස ද උපදෙස් ලබාදී තිබෙනවා.

මෙම වැසි තත්ත්වය ඉරිදා දිනය වන විට ක්‍රමයෙන් පහව යනු ඇති අතර, සඳුදා දිනයේදී යම් පමණක යහපත් කාලගුණයක් අපේක්ෂා කළ හැකියි.

කෙසේ වෙතත්, අඟහරුවාදා වන විට නැවතත් සීතල වායු ධාරාවක් සමඟ තවත් වැසි සහ ශීතල කාලගුණයක් ප්‍රාන්තය වෙත ළඟා වනු ඇති බවයි කාලගුණ අංශ පවසන්නේ.