මිනිසුන් මත්පැන් පානය කළ පසු රහස් හෙළි කිරීමට සහ නීති කඩ කිරීමට ඇති නැඹුරුව AI පද්ධති තුළින් ද දැකගත හැකි බව නව ඔස්ට්‍රේලියානු පර්යේෂණයකින් හෙළි වී තිබෙනවා.

නිව් සවුත් වේල්ස් විශ්වවිද්‍යාලයේ (UNSW) පර්යේෂකයන් පිරිසක් විසින් සිදු කරන ලද මෙම අධ්‍යයනයෙන් අනාවරණය වී ඇත්තේ, AI ආකෘතිවලට මත්වූවන් මෙන් කතා කිරීමට සහ හැසිරීමට බලපෑම් කළ විට ඒවා රහස්‍ය තොරතුරු හෙළි කිරීමට සහ වැරදි තොරතුරු පැතිරවීමට වැඩි නැඹුරුවක් දක්වන බවයි.

මෙම පරීක්ෂණය සඳහා OpenAI, Meta සහ Mistral වැනි ආයතනවල පැරණි AI ආකෘති භාවිත කර ඇති අතර, ඒ සඳහා මත් වූ පුද්ගලයන්ගේ texts 60,000කට ආසන්න දත්ත සමුදායක් යොදාගෙන තිබෙනවා.

සැබවින්ම AI මත් වීමක් සිදු නොවුණත්, එහි හැසිරීම් රටාව වෙනස් කිරීම හරහා ආරක්ෂක නීති බිඳ වැටෙන ආකාරය පර්යේෂකයන් විසින් මෙහිදී පෙන්වා දී තිබෙනවා.

මෙමඟින් AI සංවර්ධකයින්ට නව අනතුරු ඇඟවීමක් ලැබී ඇති අතර, ඉදිරියේදී මෙවැනි තාක්ෂණික පද්ධති නිර්මාණය කිරීමේදී ආරක්ෂාව සහ පෞද්ගලිකත්වය පිළිබඳව වඩාත් සැලකිලිමත් විය යුතු බවයි විද්‍යාඥයන් අවධාරණය කරන්නේ.