ඔස්ට්‍රේලියාවේ Working Holiday Visa වැඩසටහනට ගෙන එන නව සීමා හේතුවෙන් Far North Queensland ප්‍රදේශයේ සංචාරක, හෝටල් සහ කෘෂිකාර්මික ව්‍යාපාරවලට සේවක හිඟයක් ඇතිවෙමින් තිබෙන බව කර්මාන්ත නායකයන් පවසනවා.

නව ක්‍රමය යටතේ දෙවැනි වසර සඳහා Working Holiday Visa ස්ථාන 57,000 සිට 45,000 දක්වා සීමා කිරීමටත්, තුන්වැනි වසර සඳහා ස්ථාන 31,000 සිට 5,000 දක්වා දැඩි ලෙස අඩු කිරීමටත් නියමිතයි.

දෙවැනි සහ තුන්වැනි වසර සඳහා ඉල්ලුම් කරන Backpackersලාට ballot ක්‍රමයකට මුහුණ දීමට සිදුවීම නිසා, ප්‍රාදේශීය ප්‍රදේශවල මාස ගණනක් සේවය කිරීමට තරුණයන්ගේ කැමැත්ත අඩු විය හැකි බවයි ව්‍යාපාරිකයන් පෙන්වා දෙන්නේ.

Cairnsහි Crystalbrook හෝටල් සමූහයේ සේවකයන් 500 දෙනාගෙන් සියයට 45ක් පමණ Working Holiday Visa හිමියන් වන අතර, නව නීති හේතුවෙන් දැනටමත් ඇතැම් දෙවැනි වසරේ සේවකයන් ප්‍රදේශය හැර යමින් සිටින බව එහි ප්‍රධානියා පවසනවා.

Far North Queensland ගොවිපළවල සේවකයන් 15,000කින් තුනෙන් එකක් පමණ Working Holiday Makers බවත්, ප්‍රමාණවත් සේවකයන් නොමැති වුවහොත් ඇතැම් පලතුරු අස්වනු නෙළා ගැනීමට නොහැකි වී අවසානයේ ආහාර මිල ඉහළ යා හැකි බවත් ගොවීන් අනතුරු අඟවනවා.

කෙසේ වෙතත්, ෆෙඩරල් රජය පවසන්නේ ඇතිවන සේවක හිඟය පිරවීමට Pacific Island රටවලින් වැඩි සේවකයන් යොදාගත හැකි බවයි.

මේ අතර ගොවිපළවල හදිසි සේවක අවශ්‍යතා සඳහා Working Holiday Visa අයදුම්පත් වේගවත් කිරීමට ද රජය කෙටි කාලීන එකඟතාවක් ඇතිකර තිබෙනවා.