වික්ටෝරියා ප්‍රාන්තයේ ස්වේච්ඡාවෙන් ජීවිතයෙන් සමුගැනීමේ (VAD) ක්‍රමවේදය යටතේ රෝගියෙකුට ලබාදුන් ඖෂධයක්, එම රෝගියාගේ වියෝවෙන් පසු ඔහුගේ සහකරු විසින් සිය දිවි නසා ගැනීම සඳහා භාවිත කර ඇති බව වාර්තා වනවා.

පිළිකා රෝගයෙන් පෙළුණු අදාළ රෝගියාට මේ වසරේ පෙබරවාරි මාසයේදී ඖෂධ තමන් විසින්ම භාවිත කිරීමට අවසර ලබාදී තිබුණත්, මාස දෙකකට පසුව රෝගියා රෝහලේදී මියගොස් තිබෙනවා.

ඉන් දින කිහිපයකට පසුව එම ඖෂධ සහකරු විසින් භාවිත කර ඇති බවටයි විශ්වාස කෙරෙන්නේ.

වික්ටෝරියා සහායක මරණ සමාලෝචන මණ්ඩලය (Voluntary Assisted Dying Review Board) සහ සෞඛ්‍ය දෙපාර්තමේන්තුව සිද්ධිය විමර්ශනය කර ඇති අතර, මුල් අයදුම් කිරීමේ සහ ඖෂධ නිකුත් කිරීමේ ක්‍රියාවලියේ නීතිමය ක්‍රියාපටිපාටි නිසි ලෙස අනුගමනය කර තිබූ බව සඳහන් කර තිබෙනවා.

සිද්ධිය වික්ටෝරියා මරණ පරීක්ෂකවරයා වෙත යොමු කර ඇති අතර, මෙය ප්‍රාන්තයේ මෙවැනි පළමු සිද්ධිය ලෙස සැලකෙනවා.

මේ අතර 2025–26 මූල්‍ය වර්ෂයේ මෙම වැඩසටහනට අයදුම්පත් 1,150කට වැඩි ප්‍රමාණයක් ලැබී ඇති අතර, එය පෙර වසරට වඩා සියයට 40කට ආසන්න වැඩිවීමක්.

අයදුම්කරුවන්ගේ මධ්‍ය වයස අවුරුදු 74ක් වූ අතර බහුතරයකට පිළිකා රෝග තිබූ බවයි වාර්තාව පෙන්වා දෙන්නේ.