මැද පෙරදිග උණුසුම් තත්ත්වය තවදුරටත් වැඩිවීමත් සමඟ, නත්තලට පෙර ඔස්ට්‍රේලියාවේ පෙට්‍රල් සහ ඩීසල් මිල තවත් ඉහළ යා හැකි බවට විශේෂඥයන් අනතුරු අඟවනවා.

ඇමෙරිකාව මැදපෙරදිග කලාපයට තවත් යුද නෞකා යැවීමත් සමඟ බොරතෙල් මිළ ගණන් ඉහළ ගොස් තිබෙනවා.

මේ වනවිට ඔස්ට්‍රේලියාවේ සාමාන්‍ය පෙට්‍රල් මිල ලීටරයක් ඩොලර් 2.38ක් පමණ වන අතර, ඩීසල් මිල ඩොලර් 2.87ක් ලෙස පවතිනවා.

ජාත්‍යන්තර තෙල් මිල අඛණ්ඩව ඉහළ මට්ටමක පැවතුනහොත්, එය ඉදිරි සතිවලදී ඉන්ධන පිරවුම්හල්වල මිලට ද බලපානු ඇති බවටයි අනතුරු අඟවා ඇත්තේ.

මේ අතර ඩීසල් මිල ඉහළ යාම භාණ්ඩ ප්‍රවාහන වියදම් වැඩි කරමින්, ආහාර, නත්තල් තෑගි සහ අනෙකුත් භාණ්ඩවල මිලට ද බලපෑම් කළ හැකි බව National Road Transport Association පවසනවා.

බර වාහන සඳහා අය කරන ලීටරයකට ශත 32.4ක Road User Charge ගාස්තුව අඩු කරන ලෙස ද ඔවුන් රජයෙන් ඉල්ලා තිබෙනවා.

බලශක්ති අමාත්‍ය Chris Bowen පවසන්නේ ඔස්ට්‍රේලියාවේ ඉන්ධන සැපයුම මේ වනවිට ආරක්ෂිත මට්ටමක පවතින අතර, ලබන මාසයේ තවත් ලීටර් බිලියන 3.3ක ඉන්ධන රටට පැමිණීමට නියමිත බවයි.

කෙසේ වෙතත්, මැද පෙරදිග තත්ත්වය තවදුරටත් උග්‍ර වුවහොත් නත්තලට පෙර රියදුරන්ටත්, සාමාන්‍ය පාරිභෝගිකයන්ටත් වැඩි වියදමක් දැරීමට සිදුවිය හැකි බවටයි අනතුරු අඟවා ඇත්තේ.