මෙවර නත්තල් උත්සවයට පෙර තෑගි භාණ්ඩ සහ පාර්සල් නියමිත වේලාවට බෙදාහැරීම සඳහා ඒවා තැපෑලට භාරදිය යුතු අවසන් දිනයන් Australia Post ආයතනය ප්‍රකාශයට පත්කර තිබෙනවා.

නත්තල් සමයේ වාර්තාගත පාර්සල් ප්‍රමාණයක් බෙදාහැරීමට සිදුවනු ඇතැයි අපේක්ෂා කරන බැවින්, තෑගි යැවීම කල්තියා සිදුකරන ලෙසයි ජනතාවට දැනුම් දී ඇත්තේ.

පසුගිය වසරේ නොවැම්බර් සහ දෙසැම්බර් මාස දෙක තුළ පාර්සල් මිලියන 111කට ආසන්න ප්‍රමාණයක් බෙදාහැර තිබූ අතර, මෙවර එම සංඛ්‍යාව තවත් ඉහළ යනු ඇතැයි අපේක්ෂා කරනවා.

ඔස්ට්‍රේලියාවේ ප්‍රධාන නගර අතර සාමාන්‍ය පාර්සල් යැවීමේදී ප්‍රාන්ත අතර බෙදාහැරීම් සඳහා දෙසැම්බර් 21 සහ එකම ප්‍රාන්තය තුළ බෙදාහැරීම් සඳහා දෙසැම්බර් 22 අවසන් දිනයන් ලෙස නම්කර තිබෙනවා.

Express Post සේවාව සඳහා දෙසැම්බර් 23 අවසන් දිනය වන අතර, නත්තල් සුබපැතුම් පත් ප්‍රාන්ත අතර යැවීම සඳහා දෙසැම්බර් 18 සහ එකම ප්‍රාන්තය තුළ යැවීම සඳහා දෙසැම්බර් 21 අවසන් දිනයන් වනවා.

විදේශ රටවලට පාර්සල් යැවීමේදී ගමනාන්තය අනුව Economy Air සේවාව සඳහා නොවැම්බර් 24 සිට දෙසැම්බර් 4 දක්වාත්, International Standard සඳහා දෙසැම්බර් 1 සිට 11 දක්වාත්, International Express සඳහා දෙසැම්බර් 4 සිට 15 දක්වාත් අවසන් දිනයන් නියම කර තිබෙනවා.

Western Australia, Northern Territory, Tasmania සහ දුරස්ථ ප්‍රදේශවලට පාර්සල් යැවීමේදී අමතර දින කිහිපයක් වෙන්කරගත යුතු අතර, තැපැල් කාර්යාලවලට භාරදෙන පාර්සල් අදාළ අවසන් දිනයේ පස්වරු 2.30ට පෙර භාරදිය යුතු බවයි Australia Post ආයතනය දැනුම් දී ඇත්තේ.