Victoriaහි Mandarin කතා කරන ප්‍රජාව ඉලක්ක කරමින් AI තාක්ෂණය භාවිත කර වෛද්‍යවරුන් ලෙස පෙනී සිටින නව වංචාවක් සම්බන්ධයෙන් Victoria Police අනතුරු අඟවා තිබෙනවා.

මෙම වංචාවේදී scammersලා වෛද්‍යවරුන්, සාමාන්‍ය වෛද්‍යවරුන් සහ surgeonsලාගේ කටහඬ AI මගින් අනුකරණය කරමින් දුරකථන ඇමතුම් ලබාගෙන, තමන් හඳුනන වෛද්‍යවරයෙකුගෙන් හෝ වෛද්‍ය ආයතනයකින් කතා කරන බවට විශ්වාස කිරීමට සලස්වන බවයි පොලිසිය පවසන්නේ.

ඇමතුම අතරතුර විශ්වාසය තහවුරු කරගැනීම සඳහා පුද්ගලයාගේ නම වැනි පෞද්ගලික තොරතුරු භාවිත කරන scammersලා, පසුව gift cards මිලදීගෙන ඒවායේ codes දුරකථනයෙන් හෝ පණිවිඩයක් මගින් ලබාදෙන ලෙස victimsලාට බලපෑම් කරන බව සඳහන්.

සැප්තැම්බර් මාසයේදී පමණක් මෙම වංචාව සම්බන්ධයෙන් පොලිසියට පැමිණිලි 10ක් ලැබී ඇති අතර, එක් පුද්ගලයෙකු දින තුනක් පුරා gift cards මිලදී ගැනීමෙන් පසු ඩොලර් 50,000ක් අහිමි කරගෙන තිබෙනවා.

තවත් සිද්ධියකදී වෛද්‍යවරයෙකු ලෙස පෙනී සිටි වංචාකරුවෙකු පුද්ගලයෙකුගේ හදිසි සෞඛ්‍ය තත්ත්වයක් භාවිත කරමින් නැවත නැවත gift cards මිලදී ගැනීමට බලපෑම් කර ඇති අතර, එහිදී ඩොලර් 40,000ක් අහිමි වී තිබෙනවා.

යම් වෛද්‍යවරයෙකු හෝ විශ්වාස කරන ආයතනයකින් අනපේක්ෂිත දුරකථන ඇමතුමක් ලැබී මුදල්, gift card codes හෝ පෞද්ගලික තොරතුරු ඉල්ලා සිටින්නේ නම් එම ඇමතුම විශ්වාස නොකර, අදාළ වෛද්‍යවරයා හෝ ආයතනයේ නිල දුරකථන අංකය හරහා ස්වාධීනව තහවුරු කරගන්නා ලෙස පොලිසිය දැනුම් දෙනවා.

විශේෂයෙන් AI තාක්ෂණය හරහා හඳුනාගත හැකි පුද්ගලයන්ගේ කටහඬ පවා අනුකරණය කළ හැකි තත්ත්වයක් තුළ, තමන් හඳුනන පුද්ගලයෙකුගේ කටහඬින් ඇමතුමක් ලැබුණත් මුදල් ඉල්ලා සිටින අවස්ථාවකදී නැවත නිල මාර්ගයකින් තහවුරු කර ගැනීම වැදගත් බව Victoria Police අවධාරණය කරනවා.