ඔස්ට්‍රේලියාවේ කලක් ඉතා අඩුවෙන් වාර්තා වූ සරම්ප සහ ඩිප්තීරියාව වැනි රෝග නැවත වැඩිවීම සම්බන්ධයෙන් සෞඛ්‍ය බලධාරීන් අවධානය යොමු කරමින් සිටිනවා.

South Australia හි Brighton Secondary School ප්‍රජාවට සම්බන්ධ සරම්ප ව්‍යාප්තියක් මෑතකදී හඳුනාගෙන ඇති අතර, විදේශ ගමනකින් ආපසු පැමිණි පුද්ගලයෙකුගෙන් ආරම්භ වූ බවට සැලකෙන මෙම පැතිරීමෙන් තවත් සිසුන් තිදෙනෙකු සහ වයස අවුරුදු 40 ගණනක පුද්ගලයෙකුට රෝගය වැළඳී තිබෙනවා.

එම වැඩිහිටි පුද්ගලයා රෝහල්ගත කර ඇති අතර ආශ්‍රිතයන් සොයා ගැනීමේ ක්‍රියාවලියක්ද ආරම්භකර ඇති බව සඳහන්.

මෙම පැතිරීමත් සමඟ South Australia හි මේ වසරේ වාර්තා වූ සරම්ප රෝගීන්ගේ සංඛ්‍යාව නවය දක්වා ඉහළ ගොස් ඇති අතර, එය 2016 පසු එම ප්‍රාන්තයේ වාර්තා වූ ඉහළම වාර්ෂික සංඛ්‍යාව බවයි වාර්තා වන්නේ.

ඔස්ට්‍රේලියාවේ 2014 වසරේදී ස්වදේශීය සරම්ප නැති රටක් ලෙස ප්‍රකාශයට පත් කළත්, විදේශ රටවලින් ආසාදිත පුද්ගලයන් පැමිණීම හරහා රෝගය නැවත පැතිරීමට හැකියාව පවතිනවා. 

මේ අතර diphtheria රෝගයද බරපතළ ලෙස නැවත මතු වී ඇති අතර, මේ වසරේ ඔස්ට්‍රේලියාව පුරා රෝගීන් 600කට වැඩි සංඛ්‍යාවක් වාර්තා වී තිබෙනවා.

මෙය 1991 සිට නිල වාර්තා ආරම්භ වූ පසු රටේ විශාලතම diphtheria පැතිරීම බව සඳහන් වෙනවා.

සෞඛ්‍ය විශේෂඥයන් පෙන්වා දෙන්නේ එන්නත්කරණ අනුපාතය පහළ යාම, වෛද්‍ය සේවා ලබාගැනීමේ අපහසුතා සහ ලොව පුරා සරම්ප රෝගීන් වැඩිවීම මේ තත්ත්වයට බලපාන ප්‍රධාන කරුණු අතර තිබෙන බවයි. 

බලධාරීන් ජනතාවට තමන්ගේ සහ දරුවන්ගේ එන්නත්කරණ තත්වය පරීක්ෂා කරගන්නා ලෙසත්, සරම්ප සම්බන්ධ උණ, කැස්ස, ඇස් රතු වීම සහ රතු පැහැති රෑෂ් වැනි ලක්ෂණ ඇතිවුවහොත් වහාම වෛද්‍ය උපදෙස් ලබාගන්නා ලෙසත් උපදෙස් දී තිබෙනවා.