ශ්‍රී ලංකාවේ සිට ඔස්ට්‍රේලියාවට පැමිණ තමන්ගේ දක්ෂතාවය සහ කැපවීම තුළින් ආහාර පිසීමේ ක්ෂේත්‍රයේ සාර්ථක ගමනක් ගොඩනගා ගත් තරිඳු සිරිවර්ධන, අද වනවිට Cranbourneහි ප්‍රධාන Chef කෙනෙකු ලෙස කටයුතු කරන ශ්‍රී ලාංකිකයෙකි.

2009 වසරේ ඔස්ට්‍රේලියාවට පැමිණි තරිඳු, වාණිජ ආහාර පිසීම පිළිබඳ අධ්‍යාපනය ලබාගැනීමෙන් පසු ආගන්තුක සත්කාර කළමනාකරණය පිළිබඳ උපාධියක්ද සම්පූර්ණ කර තිබෙනවා. අධ්‍යාපනය අවසන් කිරීමෙන් පසු මෙල්බන්හි කුඩා Pizza සහ Pasta අවන්හලකින් තම වෘත්තීය ගමන ආරම්භ කළ ඔහු, පසුව ප්‍රදේශයේ Pub එකකද සේවය කරමින් ආහාර පිසීමේ ක්ෂේත්‍රයේ අත්දැකීම් රැසක් ලබාගෙන තිබෙනවා.

වඩා හොඳ වෘත්තීය අවස්ථාවක් සොයාගැනීම සඳහා Chef රැකියා 100කට වැඩි සංඛ්‍යාවකට අයදුම් කළ තරිඳුට අවසානයේ Red Hill ප්‍රදේශයේ Lindenderry ආයතනයේ Chef de Partie ලෙස එක්වීමට අවස්ථාව හිමිවුණා. එතැන් සිට ඔහු තම දැනුම සහ අත්දැකීම් තවදුරටත් වර්ධනය කරගනිමින් ඉහළ තනතුරු කරා ගමන් කර තිබෙනවා.

2015 වසරේදී Metropolitan Golf Club සමඟ Chef de Partie ලෙස එක්වූ තරිඳු, තම කැපවීම සහ දක්ෂතාවය හේතුවෙන් 2017 වසරේදී Sous Chef තනතුර දක්වා උසස් වී තිබෙනවා. එහිදී Ricky Ponting, දිවංගත Shane Warne සහ Brian Lara වැනි ක්‍රීඩා ක්ෂේත්‍රයේ ප්‍රසිද්ධ පුද්ගලයන් වෙනුවෙන් ආහාර පිළියෙල කිරීමටද ඔහුට අවස්ථාව ලැබී තිබෙනවා.

2018 වසරේ පැවති Golf World Cup තරගාවලිය සඳහා ආහාරපාන සැපයූ කණ්ඩායමේ සාමාජිකයෙකු ලෙස කටයුතු කිරීමද තරිඳුගේ වෘත්තීය ජීවිතයේ සුවිශේෂී අවස්ථාවක් වී තිබෙනවා. ජාත්‍යන්තර මට්ටමේ එවැනි විශාල තරගාවලියකට සම්බන්ධ වෙමින් ලැබූ අත්දැකීම් ඔහුගේ වෘත්තීය ගමන තවදුරටත් ශක්තිමත් කර තිබෙනවා.

මේ වනවිට Cranbourneහි Silks ආයතනයේ Head Chef ලෙස කටයුතු කරන තරිඳු, මුළුතැන්ගෙයි කණ්ඩායම මෙහෙයවමින් නව ආහාර මෙනු නිර්මාණය කිරීම, තරුණ Chefලාට මඟපෙන්වීම සහ පාරිභෝගිකයන්ට උසස් මට්ටමේ ආහාර අත්දැකීමක් ලබාදීම සඳහා කටයුතු කරනවා.

හොඳ Chef කෙනෙකු වීමට රසවත් ආහාර පිළියෙල කිරීම පමණක් ප්‍රමාණවත් නොවන බවයි තරිඳුගේ අදහස. තමන් සමඟ වැඩ කරන කණ්ඩායමට ගරු කිරීම, හොඳ අමුද්‍රව්‍ය තෝරාගැනීම, සෑම කුඩා කරුණක් ගැනම අවධානය යොමු කිරීම සහ කැපවීමෙන් හා විනයකින් කටයුතු කිරීම සාර්ථකත්වයට අත්‍යවශ්‍ය බව ඔහු විශ්වාස කරනවා.

ශ්‍රී ලංකාවේ සිට ඔස්ට්‍රේලියාවට පැමිණ කුඩා අවන්හලකින් තම වෘත්තීය ගමන ආරම්භ කළ තරිඳු, අද වනවිට ප්‍රධාන Chef කෙනෙකු ලෙස කටයුතු කිරීම දක්වා පැමිණ තිබෙන්නේ වසර ගණනාවක උත්සාහය, අත්දැකීම් සහ කැපවීම තුළින්. තමන් ලබාගත් දැනුම සහ අත්දැකීම් තරුණ පරපුර සමඟ බෙදාගනිමින් ඉදිරියට යාම ඔහුගේ ඉදිරි බලාපොරොත්තුවක් බවද සඳහන්.