වයස අවුරුදු 65ට වැඩි ඔස්ට්‍රේලියානුවන්ට ලැබෙන Private Health Insurance rebate එක අඩු කිරීමට රජය ගෙන ඇති යෝජනාව පාර්ලිමේන්තුවෙන් සම්මත වීම දැඩි අවිනිශ්චිත තත්ත්වයකට පත්ව තිබෙනවා.

Coalition පක්ෂය මෙම පනත Senate එකේ අවහිර කරන බව දැනටමත් ප්‍රකාශ කර ඇති අතර, Greens පක්ෂය ද දැනට පවතින ආකාරයෙන් එයට සහාය නොදෙන බවට ප්‍රබල සංඥාවක් ලබාදී තිබෙනවා.

සෞඛ්‍ය දෙපාර්තමේන්තුවේ දත්ත අනුව, මෙම වෙනසට බලපාන වයස 65 ඉක්මවූ මිලියන 3.2කට වැඩි පිරිසෙන් මිලියන 2කට ආසන්න සංඛ්‍යාවක් වසරකට ඩොලර් 37,000කට අඩු ආදායමක් ලබන අයයි.

රජයේ සැලසුම අනුව, වයස 65ට වැඩි පුද්ගලයන්ට වයස පදනම් කරගෙන ලබාදෙන වැඩි rebate එක ඉවත් කර, rebate ලබාදීම ආදායම මත පමණක් තීරණය කිරීමට නියමිතයි.

මෙම වෙනස 2027 අප්‍රේල් 1 සිට ක්‍රියාත්මක කිරීමට සැලසුම් කර ඇති අතර, බොහෝ වැඩිහිටි පුද්ගලයන්ගේ වාර්ෂික insurance වියදම ඩොලර් සිය ගණනකින් ඉහළ යා හැකියි.

මෙම වෙනස්කම් හරහා වසර කිහිපයකදී ඩොලර් බිලියන 3ක් පමණ ඉතිරි කර, aged care සේවා සහ වසරකට අමතර aged-care beds 5,000ක් නිර්මාණය කිරීම වැනි වැඩසටහන් සඳහා යෙදවීමටයි රජය බලාපොරොත්තු වන්නේ.

එහෙත් පාර්ලිමේන්තු අයවැය කාර්යාලය විශ්ලේෂණයක් අනුව එම ඉතිරිකිරීම්වලින් ඩොලර් බිලියන 1.6ක් පමණ විශ්‍රාමිකයින්ගෙන් ලැබෙනු ඇති බව වාර්තා වී තිබෙනවා.

රජයේ modelling අනුව වෙනස්කම් නිසා Private Health Insurance අත්හැරිය හැකි පුද්ගලයන් සංඛ්‍යාව 44,000ක් පමණ වන අතර, රජය පවසන්නේ ඉතිරි කරන මුදල් aged care සහ රෝහල් පද්ධතියේ පීඩනය අඩු කිරීමට උපකාරී වනු ඇති බවයි.