ඔස්ට්‍රේලියානු රජය හඳුන්වාදී ඇති නව වාහන කාර්යක්ෂමතා නීති ලබන වසරේ සිට තවදුරටත් දැඩි කිරීමත් සමඟ ජනප්‍රිය 4WD, SUV සහ Ute රථවල මිල ඉහළ යා හැකි බවට ප්‍රධාන වාහන නිෂ්පාදන සමාගම් අනතුරු අඟවා තිබෙනවා.

2025 වසරේ ජූලි මාසයේ සිට ක්‍රියාත්මක වූ New Vehicle Efficiency Standard හෙවත් NVES නීති යටතේ, ඔස්ට්‍රේලියාවට අලෙවි කරන නව වාහනවලින් නිකුත් වන කාබන් විමෝචනය සීමා කිරීමටයි පියවර ගෙන ඇත්තේ.

මෙම නීති අනුව නිෂ්පාදක සමාගමක සමස්ත නව වාහන අලෙවියේ විමෝචන ඉලක්ක සපුරාගැනීමට නොහැකි වුවහොත්, එම සමාගම්වලට මූල්‍ය දඬුවම් පැනවිය හැකියි.

Toyota, Nissan සහ Mitsubishi ඇතුළු සමාගම් පෙන්වා දෙන්නේ එම අමතර වියදම්වලින් කොටසක් පාරිභෝගිකයන්ට දැරීමට සිදුවිය හැකි බවයි.

විශේෂයෙන් Toyota HiLux, LandCruiser Prado සහ LandCruiser 300 Series වැනි ඩීසල් වාහනවල මිලට මෙම තත්ත්වය බලපෑ හැකි බව සඳහන්.

වාර්තා අනුව Toyota HiLux SR5 ඩීසල් රථයක් සඳහා 2026 වසරේදී ඩොලර් 500කට ආසන්න විමෝචන දඬුවම් වටිනාකමක් ගණනය කර ඇති අතර, 2027 වසරේදී එය ඩොලර් 2,000කට ආසන්න විය හැකි බවට ඇස්තමේන්තු කර තිබෙනවා.

කෙසේ වෙතත් එම මුදල සෘජුවම වාහනයේ මිලට එකතු වන බව මින් අදහස් වන්නේ නැහැ.

Toyota Australia සමාගමේ විධායක John Pappas පවසන්නේ 2027 සිට වාණිජ වාහන සඳහා පැනවෙන දැඩි ඉලක්ක හේතුවෙන් මිල ඉහළ දැමීමේ හැකියාව බැහැර කළ නොහැකි බවයි.

කෙසේ වෙතත් මෙම නව නීති මගින් ඉන්ධන පරිභෝජනය අඩු, පරිසර හිතකාමී වාහන වැඩි වශයෙන් ඔස්ට්‍රේලියානු වෙළෙඳපොළට හඳුන්වාදීමට අවස්ථාව සැලසෙන බවයි ප්‍රවාහන ක්ෂේත්‍රයේ විශේෂඥයන් පෙන්වා දෙන්නේ.