Adelaide උතුරු ප්‍රදේශයේ වැඩිහිටි සත්කාර මධ්‍යස්ථානයක ඩිමෙන්ෂියා ඇතුළු සංකීර්ණ රෝග තත්ත්වයන් සහිත පදිංචිකාරියකට අසාධාරණ ලෙස බලය භාවිත කළ හෙදියකට වසර දෙකක වෘත්තීය තහනමක් පනවා තිබෙනවා.

47 හැවිරිදි ලියාපදිංචි හෙදිය Su Jin Han විසින් 2023 නොවැම්බර් 12 වනදා එම පදිංචිකාරියගේ අත් දෙක බලයෙන් අල්ලාගෙන, ඇයව පිටුපසට තල්ලු කර මේසයකට ගැටෙන්නට සැලැස්වූ බවයි CCTV දර්ශනවල සටහන්ව තිබුණේ.

තවත් අවස්ථාවක ඇය එම කාන්තාවගේ අත් තදින් අල්ලාගෙන පහළට ඇදගෙන ගිය බව සවුත් ඕස්ට්‍රේලියානු සිවිල් සහ පරිපාලන විනිශ්චය සභාව සඳහන් කළා.

එමෙන්ම wipes සහ plastic lid එකක් භාවිත කරමින් පදිංචිකාරියට පහර දීමට උත්සාහ කළ බවත් තීන්දුවේ සඳහන් වෙනවා.

විනිශ්චය මණ්ඩලය පෙන්වා දී ඇත්තේ එම බලය භාවිත කිරීමට කිසිදු සායනික අවශ්‍යතාවක් නොතිබූ අතර, එය සම්පූර්ණයෙන්ම අසාධාරණ සහ අනවශ්‍ය ක්‍රියාවක් වූ බවයි.

හෙදිය තමන් එවකට රැකියා දෙකක් කරමින් සති දෙකකට එක් දිනක් පමණක් නිවාඩු ගත් බවත්, අධික වෙහෙස තම හැසිරීමට බලපා ඇති බවත් විනිශ්ය සභාවට පවසා තිබෙනවා.

අවසානයේ ඇයගේ හෙද ලියාපදිංචිය අවලංගු කර, වසර දෙකක් යනතුරු නැවත ලියාපදිංචි වීමට නොහැකි වන ලෙසත්, නැවත ලියාපදිංචිය ලැබෙනතුරු කිසිදු සෞඛ්‍ය සේවාවක් ලබාදීම තහනම් කරමින් තීන්දුවක් ලබාදී තිබෙනවා.