වික්ටෝරියා ප්‍රාන්තයේ මාර්ගවල ඇති විශාල වලවල් සහ නඩත්තු ගැටලු සම්බන්ධයෙන් විරෝධය පළ කරමින්, යතුරුපැදි ධාවකයන් සහ ඔවුන්ට සහාය දක්වන 3,000කට වැඩි පිරිසක් අද වික්ටෝරියා පාර්ලිමේන්තුව ඉදිරිපිට රැස්වී තිබෙනවා.

මෙම විරෝධතාවයේදී “මාර්ග හදා දෙන්න” යන ඉල්ලීම ප්‍රධාන වශයෙන් ඉදිරිපත් කර ඇති අතර, මාර්ගවල පවතින වලවල් යතුරුපැදි ධාවකයන්ට විශේෂයෙන්ම බරපතළ අනතුරක් ඇති කරන බවයි ඔවුන් පෙන්වා දෙන්නේ.

පසුගිය මාසයේ Western Highway මාර්ගයේ Trawalla ආසන්නයේ යතුරුපැදියක ගමන් කරමින් සිටියදී මියගිය 71 හැවිරිදි Peter “Tiki” Masonගේ මරණයෙන් පසුව මෙම ගැටලුවට වැඩි අවධානයක් යොමු වී තිබෙනවා.

ඔහුගේ මරණය මාර්ගයේ තිබූ වලක් සමඟ සම්බන්ධ විය හැකි බවට සැක පළවී තිබුණත්, සිද්ධියට නිශ්චිත හේතුව පිළිබඳ පොලිස් විමර්ශන තවමත් සිදුවෙමින් පවතිනවා.

මෑත දිනවල වික්ටෝරියා ප්‍රදේශ කිහිපයකට ඇදහැලුණු දැඩි වැසි හේතුවෙන් මාර්ගවල නව වලවල් ඇතිවීම සහ පැරණි වලවල් තවත් විශාල වීම ගැනත් රියදුරන් චෝදනා කරනවා.

වික්ටෝරියා විගණකාධිපති වාර්තාවකට අනුව, ප්‍රාන්ත රජය විසින් පාලනය කරන මාර්ගවලින් දුර්වල හෝ ඉතා දුර්වල තත්ත්වයේ පවතින ප්‍රමාණය 2021 සිට 2024 දක්වා වැඩි වී තිබෙනවා.

එළඹෙන නොවැම්බර් ප්‍රාන්ත මැතිවරණයට පෙර මාර්ග නඩත්තුව ප්‍රධාන ජනතා ගැටලුවක් බවට පත්ව ඇති අතර, ප්‍රධාන පක්ෂ දෙකම මාර්ග අලුත්වැඩියාව සඳහා විශාල මුදල් වෙන් කරන බවයි ප්‍රකාශ කර ඇත්තේ..

(ABC News)