Adelaide නගරයේ පවුලක්, තම 10 හැවිරිදි ඔටිසම් තත්ත්වයෙන් පෙළෙන පුතාගේ හැසිරීම හේතුවෙන් China Southern Airlines ගුවන් යානයකින් ඉවත් කළ බව පවසමින් ගුවන් සමාගමෙන් පැහැදිලි කිරීමක් ඉල්ලා තිබෙනවා.

Nzaifa Fatima සහ ඇගේ පවුල පකිස්තානයට ගමන් කරමින් සිටියේ ඥාතීන් හමුවීමට සහ ඇගේ දියණියගේ 14 වැනි උපන්දිනය සැමරීමටයි.

Fatima පවසන්නේ කතා නොකරන තම පුතා ගමන ගැන උද්යෝගයෙන් ශබ්ද කරමින් සහ තරමක් හඬින් සිනාසෙමින් සිටි අතර ඒ පිළිබඳව වෙනත් මගීන් පැමිණිලි කළ බවයි.

තම පුතා ගුවන් යානය ගුවන්ගත වූ පසු සන්සුන් වන බව කාර්ය මණ්ඩලයට පැහැදිලි කළද, පවුලම ගුවන් යානයෙන් ඉවත් කර ඔවුන්ගේ ගමන් මළු ද ආපසු ලබාදුන් බව Fatima සඳහන් කර තිබෙනවා.

ඇය පවසන්නේ මෙම සිදුවීමෙන් තමන් දැඩි ලෙස ලැජ්ජාවට සහ කම්පනයට පත්වූ බවත්, පවුලට වෙනත් ගුවන් යානයක්, වවුචරයක් හෝ මුදල් ආපසු ලබාදීම සම්බන්ධ ලේඛනයක් ද ලබා නොදුන් බවයි.

මෙම පවුල මීට පෙර වෙනත් ගුවන් සමාගම් සමඟ කිසිදු ගැටලුවකින් තොරව ගමන් කර ඇති බව පවසමින්, මෙවර තම පුතාට මෙසේ සැලකීමට හේතුව කුමක්දැයි China Southern Airlines වෙතින් විමසා සිටිනවා.

මේ අතර Emirates ගුවන් සමාගම පසුගිය වසරේ ලොව පළමු “Autism Certified Airline” ලෙස පිළිගැනීමට ලක්වූ අතර, ඔටිසම් තත්ත්වයෙන් පෙළෙන මගීන් සහ ඔවුන්ගේ පවුල් සඳහා ගුවන් ගමන් වඩාත් පහසු කිරීම සඳහා දහස් ගණනක් කාර්ය මණ්ඩලයට විශේෂ පුහුණුව ලබාදීමට ද සැලසුම් කර තිබෙනවා.