ඔස්ට්‍රේලියානු විපක්ෂ සන්ධානය ලබන සතියේ සිය නව සංක්‍රමණ ප්‍රතිපත්තිය ප්‍රකාශයට පත් කිරීමට සූදානම් වන අතර, එහි ප්‍රධාන අවධානය විදේශීය සිසුන්ගේ සංඛ්‍යාව අඩු කිරීම වෙත යොමු විය හැකි බව විපක්ෂ ස්වදේශ කටයුතු අමාත්‍ය Jonno Duniam පෙන්වා දී තිබෙනවා.

Duniam පවසන්නේ රටට ඇතුළුවන සංක්‍රමණිකයන්ගේ සංඛ්‍යාව තීරණය කිරීමේදී රටේ රැකියා අවශ්‍යතා සහ ඉදිකරන නිවාස සංඛ්‍යාව සලකා බලන බවයි.

පසුගිය වසරේ නිවාස 172,000ක් පමණ ඉදිකර ඇති බැවින්, වාර්ෂික ශුද්ධ විදේශ සංක්‍රමණ ඉලක්කය එම මට්ටමට හෝ ඊට පහළට ගෙන ඒමට විපක්ෂය සලකා බලන බව 7NEWS වාර්තා කරනවා.

එය Labor රජය 2027–28 සඳහා තබා ඇති 225,000 ඉලක්කයට වඩා අඩු මට්ටමක් වන අතර, One Nation යෝජනා කරන 130,000 ඉලක්කයට වඩා ඉහළ මට්ටමක් විය හැකියි.

කෙසේ වෙතත් Backpackers සංඛ්‍යාව දැඩි ලෙස අඩු කිරීමට විපක්ෂය අකමැති බවයි Duniam පවසන්නේ.

ගොවිතැන, වයින් හා පළතුරු වගාව, සංචාරක සහ ආගන්තුක සත්කාර ක්ෂේත්‍රවලට එම සේවකයන් ඉතා වැදගත් බව ඔහු සඳහන් කර තිබෙනවා.

එබැවින් සමස්ත සංක්‍රමණ සංඛ්‍යාව අඩු කිරීමේදී විදේශීය සිසුන්ගේ සංඛ්‍යාව ප්‍රධාන ඉලක්කයක් විය හැකි බවයි වාර්තා වන්නේ.

7NEWS වාර්තාව අනුව දැනට ඔස්ට්‍රේලියාවේ විදේශීය සිසුන් 589,923ක් පමණ සිටින අතර, ඔවුන් තාවකාලික සංක්‍රමණිකයන් අතර විශාලම කණ්ඩායමක් ලෙස සැලකෙනවා.

Duniam පවසන්නේ සියලුම විදේශීය සිසුන්ට එකම ආකාරයෙන් සීමා පැනවීම වෙනුවට, ඇතැම් පෞද්ගලික අධ්‍යාපන ආයතන සහ විදේශීය සිසුන් ඉතා වැඩි ප්‍රමාණයක් බඳවා ගන්නා ආයතන වෙත ඉලක්කගත පියවර ගත හැකි බවයි.

විපක්ෂයේ සම්පූර්ණ සංක්‍රමණ සැලැස්ම නිශ්චිත සංඛ්‍යා, ආර්ථික විශ්ලේෂණ සහ ජනතාවට ඇති බලපෑම පිළිබඳ විස්තර සමඟ ලබන සතියේ නිකුත් කිරීමට නියමිතයි.