පාසල් වාරය ආරම්භ වීමත් සමඟ වික්ටෝරියාව පුරා පාසල් අවට රථවාහන නීති කඩකිරීම් සම්බන්ධයෙන් විශේෂ අවධානයක් යොමු කරමින් පොලිස් මෙහෙයුම් දැඩි කර තිබෙනවා.

පසුගිය සැප්තැම්බර් මාසයේදී වික්ටෝරියාවේ මාර්ග අනතුරුවලින් පුද්ගල මරණ 40ක් වාර්තා වී ඇති අතර, එය පසුගිය වසරේ සැප්තැම්බර් මාසයේ වාර්තා වූ මරණ 28ට වඩා ඉහළ අගයක් බවයි පොලිසිය පවසන්නේ.

මේ වසරේ මේ දක්වා මාර්ග අනතුරුවලින් පදිකයන් 38 දෙනෙකු මියගොස් ඇති බවත් වාර්තා වී තිබෙනවා.

එමෙන්ම පසුගිය මාස 12 තුළ අවුරුදු 17 දක්වා දරුවන් සම්බන්ධ රථවාහන අනතුරු 305ක් වාර්තා වී ඇති බවයි සඳහන් වන්නේ.

මෙම අනතුරු වැඩි වශයෙන් පාසල් ආරම්භ වන උදෑසන 8ත් 9ත් අතර සහ පාසල් අවසන් වන සවස 3ත් 4ත් අතර කාලයේදී සිදුවී ඇති බව හෙළි වී තිබෙනවා.

ඒ අනුව පාසල් කලාපවල වේග සීමා ඉක්මවා රිය පැදවීම, රිය පදවන අතරතුර ජංගම දුරකථන භාවිතය සහ පදික මාරුවලදී වාහන නතර නොකිරීම සම්බන්ධයෙන් පොලිසිය දැඩිව නිරීක්ෂණය කිරීමට නියමිතයි.

විශේෂයෙන් දරුවන් පාසල් යන සහ පාසල් අවසන් වී නිවෙස් බලා යන වේලාවන්හි රියදුරන් වැඩි අවධානයකින් රිය ධාවනය කළ යුතු බවටයි පොලිසිය දැනුම් දෙන්නේ.

පාසල් අවට වේග සීමා සහ අනෙකුත් රථවාහන නීති නිසි ලෙස පිළිපදිමින් දරුවන්ගේ මෙන්ම අනෙකුත් මාර්ග භාවිත කරන්නන්ගේ ආරක්ෂාව තහවුරු කිරීමට සහාය වන ලෙස වික්ටෝරියා පොලිසිය රියදුරන්ගෙන් ඉල්ලා තිබෙනවා.

#Victoria #VictoriaPolice #Melbourne #SchoolZone #RoadSafety #TrafficSafety #SchoolSafety