වික්ටෝරියාවේ Gippsland ප්‍රදේශයට සති අන්තයේ පැවති අයහපත් කාලගුණය හේතුවෙන් State Emergency Service හෙවත් SES වෙත හදිසි සහාය ඉල්ලා ඇමතුම් 105ක් ලැබී තිබෙනවා.

Maffra, Heyfield සහ Bairnsdale ප්‍රදේශවලින් ලැබුණු බොහෝ ඇමතුම් ගස් කඩා වැටීම සහ ගොඩනැගිලිවලට සිදුවූ හානි සම්බන්ධයෙන් වූ අතර, පුද්ගලයන් රැගත් වාහන ගංවතුරට හසුවූ අවස්ථා පහක්ද වාර්තා වී තිබෙනවා.

Lake Glenmaggie වෙතින් ජලය මුදාහැරීම වැඩි කිරීමත් සමඟ එහි පහළ ප්‍රදේශවල මධ්‍යම මට්ටමේ ගංවතුර තත්ත්වයක්ද ඇතිවී තිබෙනවා.

මේ අතර වැසි තත්ත්වය පහව යමින් තිබියදී වික්ටෝරියාවේ ප්‍රදේශ කිහිපයක අද සිට ලැව්ගිනි අවදානම් කාලය ආරම්භ වී තිබෙනවා.

East Gippsland සහ Wellington ප්‍රදේශවල ගිනි සම්බන්ධ සීමා පැනවීම පසුගිය වසරට වඩා සති දෙකකට පමණ පෙර ආරම්භ කර ඇති බවයි වාර්තා වන්නේ.

Country Fire Authority පවසන්නේ ප්‍රදේශයේ පවතින වියළි තත්ත්වය සහ වැඩි ඉන්ධන ද්‍රව්‍ය ප්‍රමාණයක් හේතුවෙන් ලැව්ගිනි අවදානම ඉහළ ගොස් ඇති බවයි.

එම නිසා ගංවතුර තත්ත්වයෙන් පසුවන ප්‍රදේශවල ජනතාවට දේශීය හදිසි අනතුරු ඇඟවීම් පිළිබඳ අවධානයෙන් සිටින ලෙසත්, ලැව්ගිනි අවදානම් ප්‍රදේශවල සිටින ජනතාවට තමන්ගේ ආරක්ෂිත සැලසුම් සූදානම් කර තබාගන්නා ලෙසත් බලධාරීන් දැනුම් දී තිබෙනවා.

වික්ටෝරියාවේ එකම කාලසීමාවකදී ගංවතුර අවදානමත් ලැව්ගිනි අවදානමත් දෙකම මතුවීමත් සමඟ ඉදිරි දිනවල කාලගුණ තත්ත්වය පිළිබඳ ජනතාව වැඩි අවධානයකින් සිටිය යුතු බවයි හදිසි සේවා අංශ පෙන්වා දෙන්නේ.