Melbourne හි වයඹ ප්‍රදේශයේ පැය 24කටත් අඩු කාලයක් තුළ දෙවන firebombing සිද්ධියක් වාර්තා වී තිබෙනවා.

අද අලුයම 3ට පමණ Keilor හි Petrik Drive ප්‍රදේශයේ නිවසක driveway එකේ නවතා තිබූ මෝටර් රථයකට ගිනි තබා ඇති අතර, එම රථය සම්පූර්ණයෙන් විනාශ වී තිබෙනවා.

වික්ටෝරියා පොලීසිය පවසන්නේ සැකකරුවන් හදිසි සේවා එම ස්ථානයට පැමිණීමට පෙර පලා ගොස් ඇති බවයි. මෝටර් රථය තුළ කිසිවෙකු නොසිටි අතර අවට නිවාසවලට හානි සිදුවී නැහැ.

මෙම සිද්ධිය සිදුවී ඇත්තේ ඊට පෙර දිනයේ Taylors Hill හි නිවසක් ඉදිරිපිට තිබූ මෝටර් රථ දෙකකට ගිනි තැබූ සිද්ධියෙන් පැය 24කටත් අඩු කාලයකදීයි.

එම Taylors Hill ප්‍රහාරයේදී තරුණයෙකු ගිනිගෙන බරපතළ තුවාල ලබා Royal Children’s Hospital වෙත ගෙන ගොස් ඇති අතර ඔහු තවමත් අසාධ්‍ය තත්ත්වයේ පසුවනවා.

පොලීසිය පවසන්නේ එම සිද්ධියේදී භාවිත කළ බවට සැක කරන, Hoppers Crossing ප්‍රදේශයෙන් සොරකම් කළ මෝටර් රථයක්ද ගිනිගෙන විනාශ වී ඇති බවයි.

මෙම සිද්ධීන් දෙක සම්බන්ධයෙන් විමර්ශන ක්‍රියාත්මක වන අතර, තොරතුරු හෝ වීඩියෝ දර්ශන ඇති අයගෙන් පොලීසිය සහාය ඉල්ලා සිටිනවා.

(ABC News)