ඔස්ට්‍රේලියාවේ සිට විදේශ රටවලට යවන මුදල් ප්‍රමාණය සම්බන්ධයෙන් මේ වනවිට සංක්‍රමණය පිළිබඳ ජාතික සංවාදය තුළ නව අවධානයක් යොමුව තිබෙනවා.

Money Transfer Australia වාර්තාවක් අනුව, 2024 වසරේදී ඕස්ට්‍රේලියාවේ සිට විදේශ රටවලට remittances ලෙස යවා ඇති මුදල් ප්‍රමාණය ඩොලර් බිලියන 35ක් පමණ වන අතර, එයින් ඩොලර් බිලියන 7කට ආසන්න ප්‍රමාණයක් ඉන්දියාවට යවා ඇති බව සඳහන්.

මෙම මුදල් විදේශගත වීම ඕස්ට්‍රේලියානු ආර්ථිකයට බලපාන්නේ කෙසේද යන්න පිළිබඳව විවිධ අදහස් පළවී තිබෙනවා. ඇතැමුන් පෙන්වා දෙන්නේ ඕස්ට්‍රේලියාවේ උපයන මුදලේ කොටසක් විදේශයන්හි පවුල් සඳහා යැවීම හේතුවෙන් එම මුදල් දේශීය ව්‍යාපාර සහ ආර්ථිකය තුළ සංසරණය නොවන බවයි.

කෙසේ වෙතත්, ආර්ථික විශේෂඥයන් පෙන්වා දෙන්නේ මෙම සංඛ්‍යා පිළිබඳව යම් සැලකිල්ලකින් කටයුතු කළ යුතු බවයි. Australian National University හි Associate Professor Ryan Edwards සඳහන් කර ඇත්තේ ඕස්ට්‍රේලියාවෙන් පිටතට යන remittances නිවැරදිව මැනීම අපහසු බවත්, විවිධ ඇස්තමේන්තු අනුව 2024 වසරේදී එම මුදල ඩොලර් බිලියන 21 සිට බිලියන 38කට වැඩි ප්‍රමාණයක් දක්වා වෙනස් වන බවත්ය.

එමෙන්ම, මෙම මුදල් ප්‍රමාණය ඕස්ට්‍රේලියානු ආර්ථිකයේ ප්‍රමාණයට සාපේක්ෂව සියයට එකකටත් අඩු බවද Edwards පෙන්වා දී තිබෙනවා.

විදේශගත පවුල්වලට මුදල් යැවීම බොහෝ සංක්‍රමණිකයන්ගේ පවුල් වගකීම්වල කොටසක් වන අතර, ඇතැම් අවස්ථාවලදී එම මුදල් වෛද්‍ය වියදම්, අධ්‍යාපනය සහ දෛනික ජීවන වියදම් සඳහා භාවිත වන බවද වාර්තා පෙන්වා දෙනවා.

මේ අතර, Australian Bureau of Statistics දත්ත අනුව 2024–25 මූල්‍ය වර්ෂයේදී ඕස්ට්‍රේලියාවේ ශුද්ධ විදේශ සංක්‍රමණය 306,000ක් වූ අතර, එය පෙර වසරේ 429,000ට සාපේක්ෂව අඩුවීමක්.