ඔස්ට්‍රේලියාවේ කුලී නිවාස හිඟය තවදුරටත් බරපතළ මට්ටමක පැවතියද, නිවාස හිමියන්ට කුලී මුදල් තවදුරටත් ඉහළ දැමීම අපහසු වී ඇති බව නවතම Domain වාර්තාවක් අනාවරණය කරනවා.

ඊට ප්‍රධාන හේතුව වී ඇත්තේ දැනටමත් ඉහළ ගොස් ඇති නිවාස කුලී මුදල් ගෙවීමට කුලී නිවැසියන්ගේ ආර්ථික හැකියාව සීමාවට පැමිණ තිබීමයි.

සැප්තැම්බර් මාසයෙන් අවසන් වූ මාස තුන තුළ ඔස්ට්‍රේලියාවේ ප්‍රධාන නගරවල නිවාස සඳහා සතිපතා මධ්‍යස්ථ කුලිය ඩොලර් 700ක් ලෙස නොවෙනස්ව පැවති අතර, මහල් නිවාසවල කුලිය සියයට 1.5කින් ඉහළ ගොස් තිබෙනවා.

Melbourne, Brisbane, Perth සහ Adelaide නගරවල නිවාස කුලී මිල පසුගිය මාස තුන තුළ ඉහළ ගොස් නොමැති බවයි වාර්තා වන්නේ.

එමෙන්ම Sydney නගරයේ සතිපතා නිවාස කුලිය ඩොලර් 5කින් සහ Canberra නගරයේ ඩොලර් 10කින් පහළ ගොස් තිබෙනවා.

කෙසේ වෙතත් Darwin නගරයේ නිවාස කුලිය සියයට 5.3කින් සහ Hobart නගරයේ සියයට 1කින් ඉහළ ගොස් තිබෙනවා.

Domain ආයතනයේ ප්‍රධාන නිවාස ආර්ථික විශේෂඥ වෛද්‍ය Nicola Powell පවසන්නේ කුලී නිවාස සඳහා ඉල්ලුම ඉහළ මට්ටමක පැවතියද, කුලී නිවැසියන්ට තවත් මුදල් ගෙවීමට නොහැකි වීම කුලී මිල වර්ධනය සීමා කරන ප්‍රධාන සාධකය බවයි.

මේ අතර ජාතික මට්ටමේ හිස් කුලී නිවාස අනුපාතය සියයට 1ක් දක්වා ඉහළ ගොස් තිබුණද, එය තවමත් ඉතා පහළ මට්ටමක පවතිනවා.

ඉහළ කුලී වියදම් හේතුවෙන් බොහෝ පිරිසක් නගර මධ්‍යයෙන් දුරස්ථ ප්‍රදේශවල නිවාස තෝරාගැනීමට, වෙනත් පුද්ගලයන් සමඟ නිවාස බෙදාගෙන ජීවත් වීමට සහ වැඩිහිටි දරුවන් දෙමාපියන් සමඟ තවදුරටත් රැඳී සිටීමට පෙළඹී තිබෙනවා.

මේ අතර One Nation පක්ෂය ඉදිරිපත් කර ඇති සංක්‍රමණ ප්‍රතිපත්තිය යටතේ වසර තුනකදී තාවකාලික වීසා 750,000ක් අඩු කිරීමෙන් නිවාස කුලී උද්ධමනය සියයට 6.5කින් අඩු කළ හැකි බව එම පක්ෂය ප්‍රකාශ කර තිබෙනවා.

එමඟින් කුලී නිවැසියෙකුට වසරකට ඩොලර් 3,000කට ආසන්න මුදලක් ඉතිරි කරගත හැකි බවට පක්ෂය ඇස්තමේන්තු කර ඇතත්, ආර්ථික විශේෂඥයන් පෙන්වා දෙන්නේ මෙම පියවර පමණක් නිවාස කුලී දැරිය හැකි මට්ටමකට ගෙන ඒමට ප්‍රමාණවත් නොවිය හැකි බවයි.